Pranvera Vatoci: Asgjë nuk ka më vlerë më shumë sesa Jeta, Shëndeti dhe Liria

Pandemia më e pamëshirshme ndonjëherë në mbarë globin, COVID 19, ka futur thellë nën kthetrat e saj Shqipërinë dhe qytetet e saj.
Qyteti i Tropojës zyrtarisht ka rezultuar vetëm me 4 persona te prekur nga ky virus, por menjëherë janë marrë masa drastike nga Spitali ‘Isa Zllami’
Tropojë, nga Njësia Vendore e Kujdesit Shëndetësor Tropojë, nga Bashkia dhe Forcat e Policisë së këtij qyteti.
Deri më tani janë te dyshuar 129 persona, 69 nga të cilët rezultojnë të kenë dal nga karantinimi, ndërsa 60 persona të tjerë që dyshohën se mund të jenë prekur nga virusi dhe mbahen të vetizoluar në Bajram Curri, deri në kryerjen e testit. Çdo aktivitet që përbën grumbullimin e njerëzve tashmë është mbyllur, si restorante, biznese dhe shumë insitucione të tjera janë sensibilizuar me kërkesën dhe rregullat e pushtetit lokal, ku i bëjnë thirrje qytetarëve të kenë kujdes maksimal gjatë këtyre ditëve, të respektojnë rregullat, distancimin social, vendosjen e maskave dhe patjeter të qëndrojnë në shtëpi.
Kryetari i Bashkisë së Tropojës, Rexh Byberi , sëbashku me stafin e tij po bëjnë një punë të mrekullueshme, duke i ardhur në ndihmë banorëve, e çdo familje në nevojë me ushqime, medikamente dhe çdo gjë tjetër të nevojshme.
Në vijën e rrezikut, janë dhe uniformat blu, ku Policia e Tropojës po i shërben vendit dhe qytetarëve për të mbajtur sigurinë e rendit por dhe për të mbikqyr situatën e qytetarëve në lëvizje pasi si në gjithë vendet e tjera dhe në Tropojë tashmë po merren gjitha masat e duhura dhe mesa duket tropojanët janë tepër të ndërgjegjësuar në zbatimin e tyre pasi frika dhe paniku është tepër i madh edhe në Tropojë; shpresoj se ky solidaritet të vazhdoj dhe të jetë një shembull i mirë për çdo qytet tjetër që ky virus nuk është një shaka, por një përbindësh i padukshëm që ka marr jetën e mbi 1 milion njerëzve në mbarë botën deri më tani, e duket sikur sapo ka nisur, e nëse nuk respektojmë rregullat e disiplinës, dhe vetizolimin, atëherë qartazi që ky virus nuk ka të ngopur në rrugën e tij fatkeqe për qeniet njerëzore.
Po ndjek me vëmendje situatën në Shqipëri dhe si një qytetare e kësaj Republike, me mirënjohje të thellë kam një falënderim të madh për doktor Pellumb Pipero, Eksperti e Sëmundjeve Infektive pranë QSUT, i cili po ngroh zemrat e shqiptarëve me gadishmërinë e tij 24 orë në shërbim të pacientëve. Z. Pipero është një ndër heronjtë më kryesorë të kësaj beteje, i cili është dhe i qëndron në krye këtij armiku vdekjeprurës çdo ditë, pa orar , me dedikim, dhe vendosmëri i jep shpresë, forcë, dhe siguri shqiptarëve në ditët më të vështira, Mjeku i nderuar Pipero që tashmë ka fituar përjetësisht zemrat e njerëzve brenda dhe jashtë kudo ku ka shqiptar, si një ndër ekspertët më të lartë të Shëndetësisë, veçanërisht sëmundjeve infektive, Doktor Pëllumbi në misionin e tij përtej mjekut mbi gjitha si një njeri me zemer të madhe po bën histori me shembullin e tij dinjitoz për vendin dhe bashkëqytetarët shqiptarë.
Shpresoj fort, të gjithë shqiptarët, të marrin parasysh këshillat e mjekëve, dhe Institut të Shëndetësisë, dhe të gjithë ekspertëve dhe skuadres mjeksore , pasi këta heronjtë që rrezikojnë jetën e tyre në vijën e parë të vdekjes, këta mjekë që kanë lënë familjet e fëmijët e tyre në shtëpi, vetëm për t’i shërbyer pacientëve, ne duhet të ja shpërblejmë me sakrificën më të vogël nëse mund të quhet sakrificë, qëndrimi në shtëpi.
Në këtë beteje të panjohur e të rrezikshme, duhet më shumë se kurrë të jemi të bashkuar dhe të fortë sepse vetëm të bashkuar mund t’ia dalim, vetëm me njeri- tjetrin, mund ta fitojmë këtë luftë mbi vdekjen; uroj vetëm mbarësi për çdo shqiptar anembanë botës, u zhduktë sa më parë ky armik i përbashkët, sa më shpejtë një e ardhme më e ndritshme, më me shumë dashuri ndaj njeri-tjetri dhe shpresoj të jete një mesazh që asgjë nuk ka më vlerë më shumë sesa Jeta, Shëndeti dhe Liria.