Vargje poetike nga Izet Shehu

Midis maleve të kaltër,

Në det dritash e shkëlqimi,

Kam një nënë,

Kam një vatër,

Kam një xixëllim gëzimi.

Mendja më mbeti pranë tyre,

Zemra pranë tyre më mbeti.

U dërgoj fjalë me yjet,

Se jam larg,

Jam larg i shkreti.

Midis maleve të kaltër

Kam të dashurit e mi:

Kam të gjallët,

Kam të vdekurit,

Kam një qiell me dashuri.

Ejani

Ju zogjt’ e malit,

Ejani të gjithë tek unë!

T’iu rrëfej viset e mallit,

Dheun që e dua shumë.

T’iu rrëfej viset e mia,

Perla plot me gaz e brenga,

Ku shpërthen në prill qershia,

Ku harbon pylli me ëndrra.

Ejani

Ju zogjt e malit,

Ejani këtu tek unë!

T’ju bëjmë fresk me flatra malli

Shelgjeve varur mbi lumë.

Ejani

Mbi bar të biem

Si të dehur… Si të humbur…

Nën atë ninullë qershie,

Nën atë ninullë të bukur.