Cikël poetik nga Emine S. Hoti

 

 

Ëndrrat tona

 

 “Njeriu nuk mund të reshtë së ëndërruari,  sepse ëndrra është ushqimi i shpirtit”.

 Paulo Coelho

 

Vinte mbrëmja qetë – qetë,

Era e freskët na ledhatonte,

Pranë dritares rrinim  tok,

Gjyshi përralla na tregonte.

 

Pastaj shihnim  lart në qiell,

Yjet dhe hëna na vështronin,

Hë, si e keni hallin, ju fëmijë?

Koha t`flini, ëndrra t`shikoni!

 

Shkonim  te shtretërit ngadalë,

Ai më i vogli në djep flinte,

Mbyllnim sytë, gjumi na zinte,

Secili  ëndrrën e tij shihte.

 

I mbanim mend ëndrrat e bukura,

Njëri-tjetri me gëzim ia tregonim,

Pastaj vraponim, luanim me hare,

Po ëndrrat çdo çast na shoqëronin.

 

Gjyshi na dëgjonte dhe na thoshte:

Me punë ëndrrat bëhen të vërteta,

Nga ëndrrat nisin gjëra të mëdha,

Me ato bëhet më e bukur jeta.

 

 

Të jesh femër

 “Askush s’flet ashtu si gruaja,

  gjëra njëkohësisht të çiltërta dhe të thella”.

Hygo

 

Sa bukur është të jesh femër

Natyrës i jep ritëm e hijeshon,

Ashtu si natyra gjallëron jetën,

Dora femërore gjithçka lulëzon.

 

Femra i shërben së ardhmes,

Jetën dhe shoqërinë e zhvillon,

Dielli e ka dërguar me dritën e tij,

Ajo është një rreze që shpirtin ndriçon.

 

Sikur të mos të isha femër,

Asnjëherë s`do ta ndieja lumturinë,

Nuk do të ndieja gëzimi  e krijesës,

Që vjen me rrezet e  diellit në agim.

 

 Vajzat

 

Nënat vuajnë njëlloj kur lindin vajzë a djalë,

Vajza rritet, shkon e ngre një tjetër shtëpi,

Kjo është jeta e njerëzve, kështu do të vijoj,

Mjafton të kemi kudo harmoni dhe dashuri.

 

Vajza u shërben dy familjeve në jetë,

Të prindërve doemos, të sajën përjetë,

Shtëpinë e bënë të buzëqesh gjithandej,

I jep dritë e bekon me fëmijë plot shëndet.

 

Vajza në familje sjell gjallëri dhe lumturi,

Është amvisë duarartë, jetën zbukuron,

Vajza është ylber me ngjyra të magjishme,

Çdo vajzë e çdo nënë, familjen shenjtëron.

 

 Dëgjoni

 

Dëgjoni njerëzit që mendojnë me zemër,

Ata që kanë kaluar përvoja në këtë jetë,

Ata që duan të ardhmen e fëmijëve tuaj,

Ata që udhëhiqen nga dashuria e vërtetë.

 

Bashkë

 

Të mos lëndojmë motër dhe vëlla,

Të duam prindërit dhe njerëzinë,

Në botë s`ecim dot vetëm, o njerëz,

Bashkë përballojmë dhe vështirësinë.

 

 

Çikatova ime, dashuria ime

 

“Kur  je në dhe të huaj, dita të bëhet muaj”.

 Populli

 

Kujtoj me mall Çikatovën time,

Përherë  e ndiej, e shoh në ëndrra,

Është vend i shtrenjtë i zemrës sime,

Atje natë e ditë më shkon mendja.

 

Me bimë, pemtari dhe luleshtrydhe,

Me një popull t`shkëlqyer, të rrallë,

Edhe kur shoh zogjtë që shtegtojnë,

Përherë e kujtoj Çikatovën me mall.

 

Atje kam kujtimet e mia pambarim,

Atje bënë jetën e vërtetë   drenicari,

Atje në çdo pëllëmbë gjëmon historia,

Nderohet dëshmori, heroi  e luftëtari.

 

Tash po i mbush 63 vite,

Prej atje ndiej aromën e fëmijërisë,

Ledhatimet e gjyshërve e prindërve,

Ndiej kuptimin e jetës, të dashurisë.

 

Tash jam një lule mbjellë diku tjetër,

Jam larg tokës dhe rrënjëve të mia,

Brengat më mbytin çdo çast, përditë,

Më mban gjallë vetëm atdhedashuria.