Arjan Kallço: Dhe unë të kërkoj

Koha nuk është veç dhimbje.

Eci unë, ecën ti në breg

gjurmët që lemë pas

na çojnë në kreshta valësh.

Nuk i kërkojmë tjetër gjë detit,

një takim ku zemrat prapë të drithëronjë.

Kemi një moshë të pjekur

e jeta na e dha çfarë kishte menduar.

Nëse ende ruan të tjera të fshehta

ne përsëri i mirëpresim.

Dashuri do të thotë mahnitje.

Peshë. Ndihmë.

Anulim çastesh pendimi.

Asnjë psherëtimë nuk e mohon dot

lumturinë tek e cila mbytet mërgimi,

mbytet vetë monotonia e mbrëmjeve

të dimrit.

Unë vazhdoj të të kërkoj

tani që largësia është shpresa

e një ëndrre që kurrë nuk mbaron.