Poezia e Lapathiotis vjen në shqip nga Arqile Garo

…Je suis sure qu’ elle est vierge.

Elle a la beaute d’ un vierge…

Qui, elle est vierge. Elle ne s’ est

jamais souillee.*

Oskar Uajlld – «Salome»

…Hëna u shfaq si një lubi, krejt lakuriqe, sonte,

me një pasion skëterrë:

e panë qysh herët, që të gjithë, lidhëset tek trazonte,

në epshin flakë e tmerr…

Vallë ç’ të ketë parë këtu mbi tokë që e kërkon patjetër,

sa që i varen mekur,

thua se duan të ndërrojnë besën dhe fenë e vjetër,

dy gjinjtë e saj të vdekur?!

E virgjër, shterpë dhe e pa zë, si picërrak* që s’ shihet,

mbrëmjes në mjegullnajë,

ç’ i ndodhi sonte që u çmend dhe do me burrë të shtrihet,

të shfryjë dufin e saj?

…E çë se nata mengadalë hepohet përmbi hon,

lulja pret veç agimin?

Në perëndim, vetëm ajo që vuan e lëngon,

më kot shpreson shpërthimin…

*Hekata – perëndi e mitologjisë greke që shpesh përqaset me hënën.

*…Jam i sigurt që ajo është e virgjër.

Ajo ka bukurinë e një virgjereshe…

Po, po, ajo është e virgjër. Askush

s’ ka venë dorë mbi të.

*picërrak – zvarranik i ngjashëm me hardhucën, por më i madh se ajo, me pika të verdha në trup, që del zakonisht në pranverë pas shiut – pikëlore, salamandër.