Ilirian Zhupa: POROSI FËMIJËVE

Bashkë me të dashurën mbrëmjeve dhe netëve

U japim fëmijëve këto porosi:

– Vishni sandalet e lehta prej gjethesh

Dhe bridhni nën shi.

Këmishët e holla si tymi i cigares

Zhvishini te porta t’i rrëmbejë juga,

Merrni në trup gërvishtje dhe plagë –

Tatuazhe të bukura.

Kapërceni pragjet dhe rendni te muzgjet,

Humbni në dhjetor dhe shfaquni në maj,

Përgjigjuni gjyshes që thotë: “U marrtë djalli!”,

Se s’patë askund djaj.