Cikël poetik nga Avdush Canaj

 

KUR TA KESH DITËLINDJEN

 

Kur ta kesh ditëlindjen

Të gjithë yjet e qiellit

Do të zbresin

Në këmishën tënde.

 

Hëna te xhepi i zemrës

Ylberi do të bëhet kollare.

 

Ditëlindjen kur ta kesh

Sonatën e urimeve

Do ta këndojnë

Gjithë zogjtë e fushës

Ku janë e ku s’janë.

 

Do të jesh më i madh

Për një pranverë hareje

Pë një fluturim në shilarës.

 

Yjet do të zbresin

Në ditën e lindjes tënde

Gotat e gëzimit

T`i cakërrojnë bashkë me ne.

 

Ai ylli yt

Krahun do ta shtrijë

Mbi supin tënd

Ke për ta parë

Kurrë s`ka për t`u ndarë

Nga ti

As kur të rritesh.

 

NGA SOT JAM I MADH

 

S`di t`mbathësh këpucët

As s`di të vishesh vetë,

S`di këtë e s`di atë

 

Mjaftë më!

Çdo kund

Është një fund.

Edhe atje

Ku e ka skajin deti.

 

Nga sot jam i madh

Me nënën shkoj në kopsht

Ta di i gjithë planeti.

 

Mjaftë më me fjalën: I vogël

Edhe ti gjyshe e dajushi im

Kush e përsërit dy herë

Mbetet pa përqafim.

 

MOTRA E LUMTURISË

 

Flokët si pylli

Vetullat e qiellta

Sytë me liqen

Të verta faqet

Dredhëz e ëmbël buzët

Fustanin prej puhize.

 

Motra e lumturisë

Në një klasë me mua.

 

Aria

Emri yt me muzikë.

 

Dera e zemrës sime

Rri hapur për ty.

 

NE MBJELLIM BUZËQESHJE

 

Pulëbardhat me këngë

nga gjumi e zgjojnë detin.

 

Ne mbjellim buzëqeshje

ta gëzojmë planetin.

 

KUR U KTHYEM

 

Kur u kthyem,

oh, kur u kthyem

me trishtimin,

gjetëm

vetëm hirin

e shtëpisë.

 

Eshtrat

e nanës

dhe të babës

ende tymonin.