Athanasios Christopoulos: E TASHMJA

Pastaj ç’ ka pёr t’u bёrё
e çfarё mё pret nё derё
hiç kokёn nuk e çaj,
nuk e filozofoj
se trurin e rёndoj
mё kot dhe nis e qaj.

Tё bёhet çfarё tё dojё
as kam njeri nevojё
dhe qielli tё bjerё.
E toka tё vithiset,
dielli tё gremiset,
tё bёhet xёc e terr.

Tё tashmen dua unё,
orёn qё jam kёtunё,
e gjersa kam takat,
me shishen e rakisё,
nё krahё tё dashurisё,
e tё mё kenё inat.

Shqipёroi: Arqile Garo 
Nga libri “Pelegrin në Ujëvarat e Poezisë Helene”.