Aleanca për Mbrojtjen e Teatrit: Sot është ditëlindja e aktorit Mehdi Malka!
Sot është ditëlindja e aktorit Mehdi Malka. Aleanca për Mbrojtjen e Teatrit i uron me shumë dashuri dhe vlerësim:
Gëzuar ditëlindjen! Jetë të gjatë me shëndet dhe plot suksese!
Në këto ditë të vështira për vendin tonë, ditëlindja e një artisti është një moment gëzimi për të gjithë, sepse emri i tij përçon në publik menjëherë buzëqeshje, dashamirësi, respekt, vlerësim. Ndaj sot me ne bashkohen në urim artdashësit, të gjithë qytetarët, që e kanë ndjekur gjatë karrierës së tij artistike.
Aktori, i cili numëron shumë role në kinematografi dhe teatër, është artisti, qytetari që nuk bën kompromise, por lufton për të drejtën.
Z. Malka është artisti i parë që u ngjit në skenën e Teatrit Kombëtar pas çlirimit të këtij të fundit nga qytetarët më 24 korrik 2019.
Ai risolli në skenë monodramën “Marr guximin”, në kuadër të Festivalit për Mbrojtjen e Teatrit Kombëtar. Festival, i cili deri më sot numëron mbi 60 shfaqje.
Në mbrëmjen e 27 korrikut, salla e Teatrit ishte e mbushur plot. Aty jehoi jeta që po rilind mbi gërmadha 30 vjeçare dhe bërtet, kërcet për të ardhmen ndryshe. Artistë e qytetarë, njerëz me shpirt të bukur, i ridhanë jetë sallës madhështore, që i priti e i përcolli si një zonjë e vërtetë e veshur me fustan të kuq të kadifenjtë dhe i dha bekimin e saj atyre që shohin xixa shprese për këtë vend.
Gëzuar për artistin tonë! Gëzuar për artin! Gëzuar për pranverën e Shqipërisë!