Cikël poetik nga Avdush Canaj

 

AI

Poeti për fëmijë

S`është si unë,

As si ti,

Është ndryshe.

 

Ai i di përrallat

E planetit të buburrecave!

Tregun e fluturave

Ku shiten ëndrrat.

 

E njeh zogun  e vogël të kopshtit

Kur na sjell gjumin mbi flatra

Edhe tezet e diellit

Që rrisin barin me përkëdhelje.

 

Në derë të yllit shkon me lejlekun

Për një kopsë të vargut!

 

Agimit i troket në dritare

Me lapsin e vjershës.

 

Bukurinë e mëngjesit e pi

Nën vetull të mollës.

 

Me kumritë e dallëndyshet

Ditës ia fal puthjen e trëndafiles.

 

Si ti s`është,

As si unë,

Poeti për fëmijë,

Ndryshe është.

 

Hejbet me ëndrra

 

A e di pse vjen nata

këmbëgjata

a e di ti?

 

Ta sjell kalin që fluturon

me hejbet në shpinë

plot ëndrra për ne.

 

E pashë mbrëmë atë kalë

vetë e pashë

kur m’i la nën jastëk

katër ëndrra shpendishte

dy për mua

dy për ty.

 

Potkojtë i kishte prej yjesh

e ujvaren e malit në jele.

 

Dallëndyshe

 

Kush ka gjysh

e gjyshe

vetë është

dallëndyshe.