Pse nuk “guxojmë” të shndërrohemi në antiamerikanë?

Fadil Maloku    

!.

Javëve të fundit, në mediat tona sociale (portale e televizione nacionale) është evdiente se është duke u rritur një frymë më shumë artificiale se sa faktike e diskursit mbi temën e antiamerikanizmit. Natyrisht, ata që i kanë dhënë “flakë” i kanë arsyet dhe interesat e tyre. Derisa ky grupimi tjetër që i bë “avokaturë” vullnetare, natyrisht që ka motive dhe synime dalluese nga të parët. Por, edhe të parët, ashtu si edhe të dytët duke apologjetizuar në veçanti interesat shtetërore e kombëtare të Kosovës, në një farë mënyre, duke u munduar ta arsyetojnë po edhe sulmojnë njëra-tjetrën bien në grackën popullore, “e kruan vetullën, e nxjerr syrin”!? Sociologjikisht, dukuritë e reja sociopolitike në shoqërinë tonë, duhet paraprakisht t’i diagnostifikojmë në mënyrë që të kuptojmë “terapinë” adekuate. Sepse, nga këto dy taborre, mund të ndodh që qëllimin e kanë të njëjtë, por dallojnë në qasjet metodologjike për këto dukuri. E kam fjalën për antiamerikanizmin! Por, duke e bërë një analizë më të thellë sociologjike, ti krijon edhe përfundime logjike e racionale. Për mua, fakti dhe akti i hapjes se debatit (që sigurisht e qëllimisht mund të jetë i iniciuar edhe nga qarqet antishqiptare) është jo vetëm shumë i frikshëm e i rrezikshëm për gjithë ne shqiptarët, por, në të njëjtën kohë edhe i panevojshëm, i pakuptueshëm e padyshim edhe në shpërputhje me trendet aktuale, globale, kontinentale e rajonale…

2.

Nuk guxojmë të vetëmjaftohemi me frymën euforike të nacionalizmit tonë irracional. Sepse, mu ky turravrap i yni i pamenduar mund të na fut në rrugë të pakthim të konfrontimit me vlerat perëndimore. Andaj, adresa e pushtetit për të afirmuar vlerat tonë të nëpërkëmbura nga e kaluara jo fortë e largët, nuk guxon dhe nuk duhet assesi të na e krijojë “distancën sociale” me minoritetet (sidomos me serbët e manipuluar dhe kontrolluar nga regjimi fashist i Serbisë!) dhe grupet tjera etnike. Arsyeja është shumë e thjeshtë; ne si Kosovë nuk e kemi problemin me serbët vendas, por me Serbinë e cila është duke bërë gjithçka për ta “mbjellur” farën dhe disponimin antiamerikan në trojet tona shqiptare. Nacionalizmi i kosovarëve, duhet të “spastrohet” dhe dekontaminohet nga synimet dhe ambiciet irracionale nacionaliste. Poashtu, ai nuk duhet as të figurojë në programet shtetërore (derisa në ato partiake, mund të shërbej përkohësisht për interesa ekskluzive për animimin e opinionit të gjerë për t’i zgjedhur ata në aulën e pushtetit), ngase programet e simuluara dhe të stimuluara përmes “axhendave” shtetërore, shumë lehtë mund ta krijojë një gjeneratë antiamerikane e antiperëndimore. Natyrisht, këtë synim programor, kurrë nuk kisha dashur ta shoh, e aq më pak ta realizoj ndonjë subjekt i yni nga Kosova!

3.

Suma sumarum, situata në veri të Kosovës është ai “tehu i shpatës” ku më së miri do mund ta “testonim” këtë diskurs, të cilin Serbia është shumë e interesuar të na e amputojë me të gjitha mjetet (politike, diplomatike, mediale, civile, fetare, etj.) e mundshme. Pra, rreziku i politikës sonë asesi nuk guxon ta kaloj këtë “rubikon” kurthi! Ajo çka duhet tani, është se ne duhet të kërkojmë standarde e përvoja të dëshmuara euroamerikane. Të cilat në pamje të parë për nacionalistët irracionalë, fillimisht mund të duket humbje (pozitash në pushtet) e përkohshme, duhet të kompensohet nga opozita racionale (por, jo me pretendime krejt kozmopolite!) përmes ofertave programore afatshkurtra, afatmesme e afatgjata. Ndryshe, në aulën parlamentare siç edhe pamë këto ditë do të kemi vetëm zhurmues irracionalë që nuk e kanë synim dhe strategji ruajtjen dhe kultivimin e kontureve shtetërore, por të ruajtjes së privilegjeve pushtetare. Thënë edhe më thjesht; në këto orë të liga kur ekziston rreziku të na amputohet pa dëshirën dhe interesin tonë oreksi (i shumëdëshiruar nga Serbia) dhe paradigma e “tehut të shpatës” së antiamerikanizmit, duhet të demonstrojmë lojalitetin dhe ambicien e synimin tonë të padiskutuar për vlera dhe standarde europerëndimore…

(Fadil MALOKU, sociolog dhe profesor universitar.