Avdulla Kënaçi: Kantautorja e talentuar Kejsi Tola

Dua të sjell në vëmendje përpara lexuesit shqiptar këngëtaren e talentuar Kejsi Tola, e cila hyri në muzikë si një dallgë e papritur suksesi dhe njohjeje në trojet shqiptare. Tashmë ajo ka mbërritur dhe noton në ujërat ndërkombëtare të muzikës, duke debutuar me stilin e saj të jashtëzakonshëm. Kejsi krijoi muzikën dhe stilin e saj mbreslënës, me vullnet dhe këmbëngulje, duke mos u ndalur për asnjë çast në rrugëtimin e vështirë të karrierës dhe konkurrencës së pamëshirshme. Ajo ka arritur të ndërtojë albumin e saj në gjuhën angleze me nisjen e tre korpuseve të shkrimit të këngëve të njohura në mbarë botën. Pesë këngët e saj të zjarrta të pop-it lindën nga një kulm i qëndrimit në Paris, Romë dhe Barcelonë, ku ajo bashkëpunoi me disa nga muzikantët më të njohur ndërkombëtarë. Fansat të cilët janë të interesuar në procesin e shkrimit të këngëve mund të kënaqen edhe me një seri dokumentarësh me tre pjesë që pasqyrojnë punën e saj me producentët dhe kompozitorët fitues të çmimeve Grammy si Marty James, Manny Mijares, Avalan, SpacePrimates, LionChld, Tyler Conti, Peter Oliver, dhe KCdaProducer. Kjo cilësi e nivelit të lartë nuk përfundon me shkrimin e këngëve dhe regjistrimin e bërë në studion legjendare “Abbey Road” së bashku me producenten vokale Lorna Blackwood dhe inxhinierin Louis Lion, të cilët janë të njohur për mjeshtërinë e tyre në industrinë e muzikës. Ata kanë bashkëpunuar edhe me Dua Lipën dhe shumë këngëtarë të tjerë botërorë. Bashkimi i talentit dhe i përpjekjeve, të gjitha të udhëhequra nga Kejsi Tola, u kurorëzuan me një rrugëtim magjepsës Pop me tekste mbreslënëse, tashmë të njohura ndërkombëtarisht. Këngët e saj sensuale, tërheqëse dhe të mbushura me aksion, kanë magjepsur gjithë fansat e popit.

Këngëtarja dhe kantautorja shqiptare Kejsi Tola, në një periudhë të shkurtër kohore ka tërhequr vëmendjen për përpjekjet e saj të jashtëzakonshme, vokalin e këndshëm dhe përkushtimin e përpiktë ndaj profesionit të muzikantes. Nëse ju kujtohet, ajo nisi të performonte qysh në moshën 11-vjeçare. Jo shumë kohë pasi filloi të shfaqte talentin e saj, Kejsi fitoi talent show-n tek “Zërat e rinj të Shqipërisë”. Ajo ishte dy herë fituese e “Zërave të rinj të Shkodrës”. Në vitin 2008, fitoi çmimin e parë në edicionin e katërt tek “Ethet”, versioni shqip i “The Voice”, i cili hapi mundësi dhe horizonte të reja në karrierën e saj. Madje ajo përfaqësoi Shqipërinë në Eurovizion 2009 si interpretuesja më e re pas fitimit të Festivalit RTSH në vitin 2008. Në 2018 dhe 2019 Kejsi erdhi para publikut me dy hite që arritën majat e shikueshmërisë në Shqipëri, duke përfituar miliona klikime në botë me këngët “Më ke mua” (Unë jam pranë teje) dhe “U rritëm” (U rritëm bashkë). Ajo ka vendosur të zgjerojë hapësirat e saj dhe albumi i ketij viti ‘LUMINOUS’ është hapi i parë në këtë drejtim. Kejsi është jashtëzakonisht premtuese dhe në ngjitje të vazhdueshme. Mos e humbisni mundësinë për t’u njohur më shumë me jetën, karrierën dhe talentin e saj të veçantë. Ajo na bën të gjithëve krenarë, sidomos ne, të origjinës së saj.