Vasil Muka: Burgosja e syrgjinosja e biblotekës

 

Refleksione – pas 100- vjetorit të Liceut- Gjimnazit.

 Burgosja e syrgjinosja e biblotekës.

Sa u holasa (mërzita) u handakosa ( vrava) e u tromaksa (tremba) kur kërkova në gjimnaz të sho (shikoj) biblotekën time të dashur ku për 7 vjet me mund, dashuri, përkushtim e profesionalizëm punova në të për nxënësit e mi.

Ajo ziente e s’gjeje radhë në pushimet e gjata e pas mësimit.

Kishte një fond prej rreth 15 000 tituj prej 40 vjetësh, kishte koleksionet e tërë gazetave, veçanërisht Drita, e revistës Nëntori, Shkenca e jeta, etj. Një thesar i paçmuar që edukoi, mësoi e emocionoi qindra nxënës.

Me nxënësit e apasionuar pas librit, çdo mbasdite qepëm me spango, lidhëm e ngjitëm me karton gjithë koleksionet e revistat periodike.

Dollapet kërcisnin nga pesha e unë sa në një krah në tjetrin hip e zbrit në shkallë për të shpërndarë librat tek nxënësit. Bibloteka kishte 100 % të librave e kritikave të programit mësimor.

Ajo u kthye në qendër rrezatimi, nxitjeje e talenteve të reja.

E kur në 100 vjetor pyeta një kolege të letërsisë, ish nxënësen time: Ku është bibloteka ime?

Si e zënë në faj, uli kokën e më tha: I kemi syrgjinosur, profesor.

Kur u riktheva në shkollë më thanë se librat, të mbyllur në kutira bananesh, ishin vërtet syrgjynosur te dhoma në krahun e djathtë, jashtë shkollës, ndënë tarracë.

– Hapeni t’i shikoj – i thashë drejtoreshës.

Ajo, po kolege me mua e ish nxënësja iime e turpëruar më tha se mësuesit me përkushtim e angazhim i kishin magazinuar aty mos shpërdoroheshin gjatë rikonstruksionit. Sa keq u ndiem të dy.

Pyes përsëri me këmbëngulje: – Pse nuk i riktheni në biblotekë?

M’u përgjigj – se nuk kemi rafte.

Më ra pikà në kokë sa s’më ra dambllaja.

Dhjetra pyetje si çekiç më ranë në çuçkë (majë) të kokës.

Nuk kishte sponsora, që nga unë, nxënësit e ish nxënësit, të apasionuar pas librit, apo dhjetra biznesmenë, mobilierë, etj. Po Bashkia e Ministria, po deputetë e prefektë ku janë? Si bëhet rikonstruksioni pa llogaritur pajisjet e mobilimin. Apo ç’u kre binanë librave.

Jam i sigurt që 4-5 dollape mund të dhurohen nga ZVA, të gjitha shkollat e qytetit mund të dhurojnë nga 1 dollap, apo mund të merren dollapet e shkollave që janë mbyllur, etj.

Mendja më shkoi te një shkrim i Ilir Llurit për Abetaren e burgosur në kala.

Më thoni miq a nuk është e burgosur bibloteka ime?

Le të shpresojmë… se sëshpejti librat e biblotekës së gjimnazit do të fitojnë lirinë.