Zana Tako: Mos rri zgjuar natën vonë!

Me emrin tim në buzë pjalmon ëndrrën,

me të dehesh pirë e jo velur.

Nuk të vishen sytë kur sheh dritën e diellit,

përpara saj çarmatosesh,

si luftëtari kur dorëzon armën e betejës.

*

Fikur e jo zgjuar ëndrra jote,

ku shtrin krahët hapësira e motit.

Vjen jo si luftëtar i betejave të të fortit,

por i gjunjëzuar si trim i luftës me të fortin.

*

Nuk të gjuaj me vështrim,

nuk luaj as me puthjen tënde. 

Për mua je i vetmi ndriçim,

ku notoj hapësirës tënde.

*

Lufton me yjet,

por shpejt lodhen krahët e tu,

quhet betejë e humbur,

të gjesh yllin që fshihet nga sytë e tu.

*

Mos rri zgjuar natën vonë,

të gjesh ndriçim për syrin tënd,

se vij e bëhem yll në çast,

të ulem në prehërin e mendimit tënd.