Troje, dhjetëra apartamente, aksione, të ardhura nga qiratë, huamarrje dhe transaksione qindra mijëra euro. Kjo është vetëm maja e ajsbergut pasurisë së akumuluar gjatë vitit 2015 nga disa deputetë të Parlamentit shqiptar, sidomos ligjvënësit biznesmenë.

Deputeti Eduard Ndocaj, i njohur ndryshe në rrethet politike dhe mediatike edhe si “Kaubojsi”, në deklaratën e pasurisë për vitin 2015, deklaron 14 apartamente në Shëngjin me sipërfaqe 725,92 m2, me një vlerë 23,580,220 lekë. Pranë ILDKP, Ndocaj ka deklaruar edhe një shtëpi private në Sarandë, me sipërfaqe 600 m2, plus 1200 m 2 truall, me vlerë 100 mijë euro.

Deputeti deklaron edhe dy dyqane në Lezhë me sipërfaqe 259 m2, me vlerë 10,360,000 lekë, një tjetër apartament në Lezhë me sipërfaqe 69 m2, me vlerë 2,000,000 lekë. Deputeti deklaron dy një apartamente në Tiranë me sipërfaqe 320,30 m 2 dhe 94.3 m2, si dhe një bodrum me sipërfaqe 666 m2, me vlerë 496 mijë euro. Po ashtu, deputeti Ndocaj deklaron dy apartamente në Itali me sipërfaqe 480 m2 dhe 180 m2, me vlerë 650 mijë euro dhe 300 mijë euro.

Në deklaratën e pasurisë, Ndocaj deklaron edhe një truall në Shëngjin me sipërfaqe 120 m2, me vlerë 2,000,000 lekë si dhe një tjetër dyqan në Lezhë, me sipërfaqe 57 m 2, me vlerë 2,280,000 lekë. Po ashtu, deputeti deklaron edhe 16 mijë metra katrorë tokë të trashëguar. Ndocaj deklaron apartament dhe dyqan edhe në emër të bashkëshortes. Sipas deklaratës zyrtare të pasurisë, Ndocaj deklaron një kredi në shumë 325 mijë euro, Kredinë e ka marrë në vitin 2002, nga e cila ka shlyer 280 mijë euro. Po ashtu, Ndocaj deklaron edhe dy kredi të tjera në vlerat 185 mijë euro dhe 435 mijë euro.

Koço Kokëdhima

Deputeti i Partisë Socialiste, Koço Kokëdhima, për vitin 2015, deklaron shitblerje aksionesh, rritje të kapitalit në shoqëritë aksionere, të ardhura nga qeratë etj, shkruan Shqiptarja.com.

Konkretisht, Kokëdhima deklaron shitje të 100 për qind të aksioneve në një shoqëri aksione, me vlerë 15,000,000 lekë, likuidim pjesor i detyrimit nga person fizik, 50 mijë euro dhe 7,000,000 lekë, rritje kapitali në shoqërinë me përgjegjësi të kufizuar, 6,030,000 lekë, rritje të numrit të aksioneve në shoqërinë aksionere, 26,500 lekë, shtim të gjendje kreditore në kompani të ndryshme me 8,000,987 lekë, 20,127,920 lekë, 4,642,889 lekë dhe 1,871,650 lekë.

Në deklaratën e pasurisë, deputeti Kokëdhima deklaron të ardhura nga dhënia e ambienteve me qera në shumat 399,500 lekë, 51,000 lekë dhe 51,000 lekë. Ndërkaq, në emër të bashkëshortes, deputeti Kokëdhima deklaron disa paga si administratore e shoqërive të ndryshme në shumat 720,326 lekë, 851,939 lekë, 46,550 lekë, 38,640 lekë dhe 956,340 lekë. Zonja deklaron edhe 340,445 lekë të ardhura të përfituara nga Sigal për rimbursim dëmi si dhe lëvizje llogarish. Vajzat, Bora, Besa dhe Era deklarojnë llogari bankare, blerje makine, të ardhura nga pagat etj.