Në një vit, 48 mijë shqiptarë u bënë nënshtetas grekë dhe italianë

Shqiptarët, sipas Eurostat-it, hyjnë në grupin e përfituesve më të mëdhenj të nënshtetësisë së një vendi europian.

Duke marrë në shqyrtim të dhënat e përpara dy viteve, Agjensia Europiane e Statistikave vëren në përgjithësi një rënie të numrit të personave që e kanë pasur këtë shans: në vitin 2013, dokumentat në fjalë i kanë siguruar 980 000 vetë, në vitin 2014 shifra ulet në 890 000 e më pas, në vitin 2015 tkurret në 840 000. Në 5 vjet, vëren Eurostat, totali i qytetarëve që kanë fituar nënshtetësinë e një vendi anëtar të bllokut europian është mbi 5 milionë vetë. Përgjatë vitit 2015, që është dhe viti i shqyrtuar nga agjensia, pjesa dërrmuese e këtyre përfituesve, ose e thënë në shifra 87% e tyre, ishin shtetas që nuk vinin nga vende të BE-së.

Në krye të listës së grupit të përfituesve për këtë periudhë kohe renditen marokenët. 86 100 të tillë janë pajisur më së shumti me pasaporta italiane, spanjolle ose franceze. Të dytët vijnë shqiptarët, me 48 400 vetë. Në 96% të rasteve tona mbizotërojnë nënshtetësitë e marra në Itali e Greqi. Shqiptarët kanë lënë pas turqit, që përfitojnë kryesisht nënshtetësinë gjermane, rumunët me atë italiane, pakistanezët që marrin më tepër nënshtetësinë britanike dhe algjerianët e orientuar drejt asaj franceze.

Nga anëtarët e bllokut, rezulton që nënshtetësinë e një shteti tjetër të Bashkimit Europian ta kenë fituar më shumë rumunët dhe polakët. Rregullat për tu bërë qytetar i BE-së kanë specifika sipas vendit, por përgjithësisht ajo që kërkohet më shumë është që personi të ketë jetuar aty të paktën 5 vjet, të ketë mësuar gjuhën ose në disa raste të ketë njohuri bazë, e të ketë të dhëna të pastra penale.