Ka disa muaj që mjetet e informimit publik po thyhen nga prononcime e thirrje të drejtëpërdrejta të kryetarëve të shteteve, sekretarëve, zv/sekretarëve, ambasadorëve e diplomatëve të tjerë të rëndësishëm, të cilët marrin mundimin të merren me punët e brendëshme të një vendi të vogël dhe të parëndësishëm për të miratuar një reformë, që mesa duket është më e rëndësishme se vete ai.

Asnjëhere nuk kemi patur privilegjin që kaq shumë personalitete të bëhen një fjale dhe të kërkojnë me ngulm e konsistencë miratimin e një reforme. Biles deklaratat e ambasadorit amerikan Z.Donald Lu janë aq direkte dhe të forta, sa kur e degjon teksa përpiqet me tërë vullnetin dhe dijen e tij në shqip, të kaplon një dëshirë e fortë për të protestuar për gjithë atë kohë e nerva të harxhuara të këtyre personaliteteve dhe të tërë shqiptarëve që tash 25 vjet s’guxojmë as të kthejmë kokën mbrapsht e të shohim si kemi ngelur vend numëro, me këmbët zhytur në llucë.

Unë kam shkruar dhe herë tjetër për reformën dhe domosdoshmërinë e saj duke e trajtuar në rrafsh më teorik, por sot ndjej nevojën të shprehem si një qytetare e revoltuar me lojrat pa zarar të disa politikanëve të vendit tim. Kur Z. Lu tha ata ju marrin për dele, unë papritmas ndjeva një si sens ovin brenda meje.

Kujt t’i duket qesharak apo i tepërt ky krahasim, duhet të frikësohet për nivelin e delezimit të vet deri në pikën që se kupton më. S’ka asgjë në fakt për tu habitur nëse pranon që shqiptarët sillen më shumë si tufë e madhe me dele sesa si shoqëri.

Ne vijmë nga një e kaluar historike me luftra, dhunë e diktatore ku na është lëmuar cdo cep nga autoritarizmi. Në këtë nivel pervers konformizmi ku kemi arritur  është e pamundur të ndërtojme shoqëri me vlera. Ne na mungon pothuajse fare ndjenja komunitare dhe për cdo gjë i referohemi vetëm vehtes ose një rrethi shume të ngushtë personash, mendojme si të përfitojmë vetëm për vehte duke përdorur cdo mjet, si të mbajmë vetëm shtëpinë tone brenda 4 mureve pa asnjë përgjegjësi për pronën e përbashkët, bëjmë vetëgjyqësi dhe me një koeficient shumë të lartë për numër popullate vetëndërmarrim dënime kapitale me heqje jete të tjerëve.

Në keto kushte, cdo formë e caktuar qeverisje që nuk përmban elemente të shprehur mirë të autoritarizmit do jetë e destinuar të sfumohet përballë formave të pushtetit të tipit feudal si ai i Berishës, që në vetvete nuk prodhon asgjë përvecse garanton edhe me tej kushtet dhe mekanizmat që shqiptarët të funksionojnë si tufë dhe jo si komunitet. Kjo është dhe arsyeja pse një grup i madh personalitetesh botërore po kërkojnë që ne të ndahemi njëherë e mirë nga kjo formë arkaike pushteti, po kundërvihen duke investuar autoritetin e tyre përballë pushtetit feudal të një burri idhnak e plak në të gjitha kuptimet dhe po mundohen të na bëjnë të kuptojmë se ka ardhur momenti që autoritarizmin e pushtetit ta zevëndësojmë me autoritetin juridik. Pikërisht kjo është edhe arsyeja që ne do ishim vërtetë dele nëse nuk mbështesim vehten në një moment kaq deciziv.

Mbeshtetja e vehtes fillon nga ju kryetari i ri de jure i Partisë Demokratike, rritur e shkolluar në Holandë me aspiratën që një ditë të mund t’i drejtoni shqiptarët me një vizion tjetër nga parardhësi yt plak i partisë.

Ka ardhur momenti qe ju Z. Basha të keni nderin të paraqiteni për herë të parë si kryetari de facto i Partisë Demokratike, si ai që i degjon të gjithë dhe në fund merr vendimin e duhur sepse kryetar s’të bën karrigia që ju mbani sot por përgjegjësia që do jeni në gjendje të mbani nesër. Ajo karrige tashmë është e juaja dhe askush s’guxon t’jua cënojë me kërcënime sepse do dini t’i tregoni vendin. Gjitha tjerat jane qurravitje dhe shtrigime. Kështu duan t’ju shohin shumica e simpatizantëve të partisë suaj dhe gjithë pjesa tjetër e qytetarëve shqiptare që janë lodhur nga thirrjet histerike te Berishës e ca ithtarëve të tij pengmarrës. Po të duash ti ata s’kanë asgjë në dorë përvec se te cirren.

Nunc aut numquam Z.Basha!

Edhe per ju Z.kryeminister kam dicka. Përvec vullnetit dhe dëshirës që keni treguar nga fillimi deri më sot për ta realizuar reformën në drejtësi, ju lutem tregoni maksimumin e bujarisë suaj që diskutimi me Z.Basha të pasohet nga një moment solidarizimi për të gjithë ne. Solidariteti lind ne kushtet e mirëkuptimit absolut. Z. Basha ka nevojë nesër më shumë se kurrë që një kryeministër modern, i ri, i fortë si ju të jetë shembulli dhe garancia e tij, pavarësisht krahëve politikë dhe jo plakushi bizantin që e mban lojën ndezur vec me presione. Z.Rama te gjithe garantët e huaj, vendas dhe shumica e shqiptarëve, jam e bindur që sot investohen tek bujaria  e juaj.