Miss-i i Shqipërisë kërkon të marrë edhe kurorën e Universit
- Bukuria e Universit në testimin e bukurosheve të botës, flet Lindita Idrizi, vajza që do të përfaqësojë vendin tonë dhe që katër ditë më parë e rrëmbeu këtë kurorë në Shqipëri
Nga Fatos Salliu
Lindita Idrizi është bukuroshja shqiptare që do të konkurrojë në Miss Univers për të tentuar pse jo të sjellë kurorën në Shqipëri. Në një rrëfim të saj për “Shekulli-n” vajza që është zgjedhur Mis Universi për Shqipërinë, një nga disa kurora bukurie që ndahen në vendin tonë, ka folur mbi planet e saj, të shkuarën dhe të ardhmen ndërsa të sotmen thotë se e lidh vetëm me shkollën.
Ndonëse fjalëpakë, vajza tregon se ka hobi muzikën, ndërsa në jetën e saj idhulli i vetëm i saj, deri më tani thotë se është i ati. Ajo tregon se ka qenë pjesë e një sërë spektaklesh bukurie, ndërkohë që tashmë do të përfaqësojë vendin tonë tek ajo që konsiderohet edhe bukuria e Universit. Vajza që pëlqen Angela Merkel, tregon se ka oferta dhe kontrata edhe nga jashtë, ndërsa nuk e përjashton mundësinë të jetë një modele e suksesshme, meqë tashmë bukurinë e ka të testuar në një sërë evenimentesh.
Si ju lindi ideja për të hyrë në botën e miss-eve dhe modelingut? A ishte e vështirë?
Si fillim karriera ime ka nisur te “Miss Elbasani” ku kam dalë edhe fituese. Hapat e parë kanë qenë të vështirë deri sa e kuptova se si funksiononte karriera në këtë fushë.
Kush ju ka mbështetur që të promovoheni në këtë fushë?
Unë e kisha me pasion këtë fushë. Gjithsesi dëshira e madhe më bëri që të përballoja vështirësitë e fillimit. Por me ndihmën e menaxherit Eduart Deda kam arritur t’ia dal. Eduarti ka bërë shumë kujdes në promovimin tim. Gjithmonë më ka këshilluar dhe është munduar që unë të shkëlqej kudo.
Në sa spektakle ke marrë pjesë? Cili ka qenë më i veçantë për ju?
Në fillim kam marrë pjesë në Miss Elbasani. Pastaj në Miss Shqipëria. Në mis Eurokontinental që u zhvillua në Itali dhe në fund Miss Univers Albania. Për sa i përket emocioneve çdo spektakël për mua ka pasur veçantinë dhe emocione të ndryshme.
A është e ndershme përzgjedhje e fitueseve?
Deri më tani me aq sa kam konstatuar mendoj se përzgjedhja është e ndershme.
Çfarë mund të thuash për Elbasanin?
Natyrisht që Elbasani është qyteti ku ruaj shumë kujtime. Ai qytet më ka bërë që të ndjehem krenare. Por edhe unë kam bërë që ai të ndjehet krenar për mua. Për sa i përket shkollës ku kam mësuar (shkollës Onufri) dua të veçoj mësuesen time kujdestare Darlina Prifti Çoku, e cila më ka qëndruar pranë si një mësuese por edhe si një nënë.
Cili është mendimi juaj për konkurse të këtij lloji në Shqipëri?
Këto konkurse, përveçse të dhurojnë emocion dhe eksperienca të bukura, të krijojnë mundësinë që të punosh brenda dhe jashtë vendit.
Si e përjetuat zgjedhjen fituese në Miss Universe?
Nuk gjej fjalë ta përshkruaj. Janë momente, çaste që un ë nuk do ti harroj asnjëherë.
Hobi juaj?
Hobi im është muzika.
Idhujt e tu?
Idhulli im është vetë babai im. Ai është njeriu më i dashur për mua. Ai ka një karakter shumë të fortë. Është i guximshëm dhe njeriu më me kurajo që unë njoh.
Cilat janë momentet e tua më të vështira deri më tani?
Fatmirësisht nuk kam pasur momente të vështira në jetë. Gjithmonë kam ditur t’ia dal dhe t`i zgjidh gjërat.
Politikani që pëlqen në Shqipëri (ose botë)?
Politikani që më pëlqen më shumë është Angela Merkel
A je e dashuruar?
Nuk jam e dashuruar. Për mua parësore tani për tani është vetëm shkolla.
Çdo të thotë të jesh një miss?
Të jesh një miss është gjëja më e bukur për çdo vajzë. Por duhet të dish të menaxhosh veten dhe si të kujdesesh për veten tënde.
Avantazhet e tua?
(Qesh). Mendoj se fiziku, pamja e veçantë që kam të cilën ma kanë vlerësuar të gjithë. Kjo më ka bërë që të dalloj e të jem në avantazh me të tjerat. Mendoj se bukuria pa inteligjencë nuk ka vlerë. Ndaj i lidh me të dyja.
A keni oferta ose kontrata bashkëpunimi?
Po kam. Kam oferta dhe kontrata, por që për momentin nuk kam vendosur pasi dua të kap një kontratë që ja vlen.
Çfarë projektesh ke për të ardhmen?
Kam projekte por që kanë të bëjnë me modelingun.
Si e pret Miss Universe? Do vijë kurora në Shqipëri?
E pres me shumë emocion. Sa i përket kurorës unë do të jap maksimumin që ta sjell në Shqipëri që ta përfaqësoj vendin tim denjësisht.