79% e gjyqtarëve të karrierës nuk e justifikojnë pasurinë

64 nga 81 gjyqtarë të Apelit në Republikën e Shqipërisë, ose 79 %, nuk e justifikojnë pasurinë në një ose më shumë vite përgjatë karrierës së tyre në sistemin e drejtësisë.

Ky është rezultati i një studimi të kryer nga rrjeti investigativ Birn, që ka studiuar dhe analizuar të gjitha deklaratat e pasurisë së gjyqtarëve të gjykatave të apelit në të gjithë vendin që prej 2004-2015.

Në një artikull të publikuar nga Birn thuhet se janë marrë nga ILDKP 959 deklarata vjetore të gjyqtarëve të gjykatave të Apelit, të administruara në 11 vitet e fundit, duke eleminuar vitin fillestar të deklarimit, me ndihmën e tre ekspertëve të pavarur, BIRN i nënshtroi 879 deklaratat vjetore të gjykatësve të Apelit në kontrollin aritmetik dhe logjik nga 3 ekspertë të pavarur ku 131 prej tyre rezultojnë me probleme.

Nga 81 gjyqtarë Apeli që ka gjithsej Shqipëria, 64 prej tyre ose 79% e totalit rezultojnë se kanë pasur të paktën në një vit të karrierës së tyre diferenca të pajustifikuara midis pasurisë së krijuar dhe burimeve financiare të deklaruara.

Nga numri i gjyqtarëve që kanë rezultuar me probleme, bazuar në të dhënat e vetëdeklaruara, rezulton se 16% e tyre në 10 vite deklarim të marra në shqyrtim kanë 4-6 deklarata me probleme; 31% e tyre kanë 2-3 deklarata me probleme dhe 53% e tyre kanë vetëm një deklaratë me probleme.

Nga të gjithë gjyqtarët e Apelit, deklaratat e të cilëve janë të identifikuara me probleme, ILDKPI gjatë dekadës së fundit ka paditur në prokurori vetëm tre prej tyre, por këto padi janë hedhur poshtë nga gjykata dhe prokuroria.