Ministrja e Mbrojtjes, Mimi Kodheli deklaroi dje, se të gjithë ata veteranë të kategorisë së parë që kanë marrë statusin për kontributet e tyre gjatë luftës, “ta gëzojnë”.

Gjatë një interviste, dhënë për “ABC News”, Kodheli u pyet përveçse për pushimet dhe aksionin e Forcave të Armatosura për të pastruar bregdetin e jugut, edhe për dekoratat që u ndanë në nëntor të vitit 2014. Dhënia e dekoratave me rastin e 70-vjetorit të Çlirimit, atë vit ngjalli debate, dhe kjo u denoncua nga “Gazeta Shqiptare” së pari, për shkak se në ato lista kishte emra të ish-persekutorëve të komunizmit. Pas këtij denoncimi të Gazetës, qeveria dhe kryeministri deklaruan se do të rishikonin ligjin dhe listat, ndërsa tashmë qëndrimi i ri është se ata që e kanë marrë këtë status për shkak të kontributeve gjatë luftës, do ta mbajnë atë. Por, nga ana tjetër, ministrja Kodheli tha se është për rishikimin e listës.

“Unë jam kurrkushi që t’i vë vizën aktivitetit të dikujt. Është thënë se do të rishihet. Këto statuse, këto pensione, këto dekorata janë marrë për periudhën e luftës. Pra gjatë kohës së luftës këta kanë pasur këtë kontribut. Mund të kenë shumë njolla në biografi, si shumë të tjerë. Por, e para i takon historisë ta vlerësojë, dhe e dyta duhet të zbatojmë ligjet”, – deklaroi ministrja e Mbrojtjes. “Unë, – shtoi ajo, – jam shumë dakord të them që ‘hajde ulemi e ta bëjmë’. Kanë pasur 8 vjet kohë që nuk shikoj asnjë të persekutuar në opozitë. Por dua t’ju them ‘hajde ta rivlerësojmë’. Duhej ta kishin bërë, nga e para, kush e meriton dhe kush jo. Nëse ka një periudhë të errët për gjithkënd në këtë listë, kjo të rivlerësohet. Nëse kjo është marrë për kontributin për luftën, le ta mbajnë këtë status dhe ta gëzojnë”, – deklaroi ministrja Kodheli. “Por, – vijoi ajo, – në respekt të të gjithë atyre që janë lënduar, unë them që ligjet duhet të rishihen”.