Nis gjyqi i madh në Turqi, 500 puçistë në gjykatë

500 persona të akuzuar si pjesëmarrës të grushtit të shtetit të një viti më parë në Turqi do të dalin ditën e sotme përpara gjykatës në Ankara.

Sipas mediave turke, këta persona përballen me një sërë akuzash si vrasje, shkelje e kushtetutës dhe tentativë për të vrarë presidentin e Turqisë, Recep Taip Erdogan.

Mes të arrestuarve ka ushtarakë, biznesmenë, por edhe imamë. Sipas akuzës, tentativa e grushtit të shtetit është organizuar nga baza ajrore Akinci në verilindje të kryeqytetit, të cilën autoritetet e shikojnë si selinë e komplotuesve nga ku u dërguan urdhrat për të bombarduar parlamentin.

Vetëm 7 nga të akuzuarit janë në kërkim, ndërsa pjesa tjetër janë në burg.

Një prej personave të akuzuar dhe që konsiderohet organizatori i grushtit të shtetit është kleriku mysliman Fethullah Gulen, i cili ndodhet në Shtetet e Bashkuara.

Nga tentativa për grusht shteti e një viti më parë në Turqi humbën jetën 250 vetë.