Izet Duraku: MUZG BUKURIE

Vatrës së syve
Përzishëm ngrihet perdja :
Hi ngrehinash gërmadhë,
Miliona golgota pranë qiellit
Rrëzohen ferrit të nëndheshëm.

Po afron fundi i botës, thue,
Kur unë lus fillimin,
Mëngjesin e vashës së virgjën
Ku la mendjen Hyu.

Në zinxhirin e hollë si vesë
Midis gjinjve
Mend këputem,
Bie.
Unë apo
Shejza e birit të kryqzuem?!

Ban pak mënjanë
Djalë perëndie,
Ta provoj kunorën me gjemba,
Dimna e golgota bashkë
Ta shfryjnë apokalipsin!