Ndue Lazri: NË BEBE TË SYRIT

Ti më vjen pranë me lule e veshur,

e pemët zilepsen me ty anekënd,

më sheh në sy e thua duke qeshur:

Dua të shikohem në syrin tënd.

Portreti yt shfaqet në bebet e syve,

e shkrihet ëmbël në të tyren kaltërsi,

natyra na mbështjell me blerim të dyve,

e ne i falim aq shumë dashuri.

Në të vërtetë ti je në zemrën time,

që zgjerohet për ty sa një oqean,

ti me cicërima zogjsh në fluturime

shfaqesh në bebëzat e mia si n’ekran.