Neviana Shehi: NËNA IME

 

Fotografia, Maj 2020.

 

Nëna ime tani është bërë më e bukur

ndonëse fytyra i ngjan një harte

me rrudha pa fund.

 

Tashmë flet më pak

është më e tërhequr

dhe një nerv i padukshëm

gjithë trupin ia tund.

 

Nëna ime është një banore

e heshtur

e librit të jetës.

 

Duke nënvizuar me heshtje

gjithçka që s’i pëlqen

flet me të vdekurit e saj

më shumë se me të gjallët

ndoshta vetëm me ta

gjen gjuhë të përbashkët.

 

Fle pak, shumë pak,

sepse ajo s’sheh më ëndrra

ëndrrat që kishte i dogji në vite

tashmë sytë e saj i ngjajnë

një qielli të acartë

që më shumë se me diej

është mbushur me mite.

 

Nëna ime është unë

në kohët e ardhshme,

por dhe një e shkuar

ngjyrë droje.

 

Një e nesërme e prekshme

që veç me veten matet

pak amazone e gjallë

dhe pak Helenë Troje

Nëna ime.