Arqile Garo: NË BREGUN E LUMIT
Në bregun e lumit,
me flokun lëshuar,
tek mbyt dëshpërimin,
këngës ja merr shtruar.
Pa qeton dhe dallgët
lumë i turbulluar,
shfryn dertet e shpirtit,
tek ja kthen malluar.
Ngashërehet, qan,
zemr’ e përvëluar,
shkëlqen ai lot,
në syrin e shkruar.
Psherëtimë e shkretë,
gjoks i drithëruar,
si rrufe mbi retë,
me rrebesh trazuar.
Oh, ç’na ngushëllon,
moj qofsh e bekuar!
Këngën labërishte xhane,
kush ta ka mësuar?!
– Ma mësuan Zanat,
që lodrojnë ndër pyje!
Ma mësuan gjyshet,
që ndriçojnë, ndër Yje!
Please follow and like us: