Ambasadori britanik: Mbështesin punën e SPAK për t’i dhënë fund pandëshkueshmërisë
Ambasada britanike në Tiranë ka reaguar në lidhje me deklaratat e ardhura nga politika kundër Prokurorisë së Posaçme. Përmes një postimi në rrjete sociale në faqen e ambasadës, ambasadori Alastair King-Smith, rithekson mbështetjen e fortë të Mbreterisë së Bashkuar për SPAK-un.
Ambasadori nënvizon se përpjekjet e Prokurorisë së Posaçme janë jetike për përmirësimin e llogaridhënies dhe për t’i dhënë fund pandëshkueshmërisë në vend.
“Ambasadori britanik, Alastair King-Smith përsëriti mbështetjen e fortë të Mbretërisë së Bashkuar për Prokurorinë e Posaçme të Shqipërisë, SPAK dhe përpjekjet saj jetike për përmirësimin e llogaridhënies dhe për t’i dhënë fund pandëshkueshmërisë në interes të të gjithë qytetarëve shqiptarë. Ambasadori konfirmoi në takimin e përbashkët të donatorëve të SPAK, javën e kaluar, angazhimin e Mbretërisë së Bashkuar për të ofruar asistencë shtesë dhe ngritjen e kapaciteteve për punën e SPAK, në përputhje me Memorandumin e Mirëkuptimit të nënshkruar nga kryeprokurori i posaçëm, Altin Dumani dhe Agjencia Kombëtare kundër Krimit (NCA), si dhe hetimet e përbashkëta me agjencitë e tjera ligjzbatuese të Mbretërisë së Bashkuar”, thuhet në njoftimin e ambasadës.
Kujtojmë se më herë kundër sulmeve ndaj institucioneve të drejtësisë reagoi dhe ambasada e SHBA-ve në Tiranë.
Deklaratat e selive diplomatike vijnë pas akuzave që kreu i Partisë së Lirisë, Ilir Meta, ngriti ndaj kreut të SPAK Altin Dumani, se hetimi ndaj tij nisi në vitin 2019, pas takimit që Dumani pati me ish-agjentin e lartë të FBI, Charles McGonigal.
https://euronews.al/ambasada-britanike-mbeshtesin-punen-e-spak-per-ti-dhene-fund-pandeshkueshmerise/
Please follow and like us: