Cikël poetik nga Avdush Canaj

JAM I VARFËR E I PASUR

Jam i varfër
e i pasur.

Me një pulëbardhë pikture
shkoj në det
delfinët ma mësojnë notin
për një orë

Bilbili i përrallës së gjyshit
është biletë imja
bashkë shetisim botën
me trenin e erës
deri te mrekullia e shtatë

Edhe puthja kryen punë
për të parë nga dritarja e lules
si vjen ëndrra në kopsht
në krahët e buzëqeshjes

Kam kitarën magjike
të pëllumbave të dashurive
zemërimin e kthejnë
në përqafime

Jam i varfër e i pasur
me të vërtetë.

TEK MUZIKË E VARGUT

Të gjithë e dinë:
Tek muzikë e vargut
Kam shtëpinë
Me një mollë
E një fik.

Në degët e pranverës
Bleroj këngët si zogjtë
E rritem bashkë me ju
Rritem një përçik.

EMRIN TIM E FSHIU ME GOMË

Trokiti dera, trokiti
Një ditë pranverore
Ishte vdekja, ajo ishte
Erdha të të marr për dore

Kam nis një libër, i thashë
Me vargje gjithë blerim
Dua t`i gëzoj si përherë
Fëmijët e planetit tim

Kur ta thur mirë e mirë
Me fluturat në avlëmend
Eja e më merr mua pastaj
Siç merr gjithë me rend

Iu zbut zemra vdekjes
Iku me anije nëpër det
Emrin tim e fshiu me gomë
Nga fletorja e vet.

KOSOVË

KOSOVË,
ashti im i shpuar,
lulëkuqja e gjakut tim,
gëzuar Ditën Tënde!