“KEY OF LECCE” – E MILOT, NJË SIMBOL UNIVERSAL NË ZEMËR TË AAB TË LEÇES
Në qytetin e gurit të artë, ku drita e Mesdheut përkëdhel fasadat baroke dhe historia takohet çdo ditë me të ardhmen, vepra monumentale “Key of Lecce” e artistit italo-shqiptar Alfred MIRASHI Milot zuri vendin e saj të përhershëm në oborrin e Akademisë së Arteve të Bukura të Leçes.
E realizuar në çelik Inox Corten, me përmasa 260 x 120 x 100 cm dhe me një peshë prej 700 kilogramësh, kjo skulpturë nuk është thjesht një objekt artistik; ajo është një metaforë e hapjes, e dijes dhe e dialogut. Një çelës që nuk hap një derë të vetme, por horizonte. Një simbol që fton në udhëtimin e pafund të njohjes, krijimit dhe bashkëjetesës mes kulturave.
Nën kurimin e profesorit Massimo Guastella, vepra u vendos në një hapësirë ku çdo ditë lindin ide të reja, ku studentët kërkojnë gjuhë të reja shprehjeje dhe ku arti bëhet urë mes brezave. “Key of Lecce” bëhet kështu një pikë takimi mes memories dhe vizionit, mes traditës dhe bashkëkohësisë.
Përmes kësaj vepre, Milot – i njohur për dimensionin publik dhe monumental të krijimtarisë së tij, si dhe për praninë e tij në skenat ndërkombëtare të artit, përfshirë Bienalen e Venecias – kjo veper Leçes një mesazh me vlerë universale: se kultura është çelësi më i fuqishëm për të hapur portat e mirëkuptimit njerëzor.
E vendosur përgjithmonë në zemër të Akademisë, “Key of Lecce” do të mbetet një shenjë e gjallë e dialogut, një pikë referimi për studentët, qytetarët dhe vizitorët, një kujtesë se arti ka fuqinë të hapë dyer që koha nuk mund t’i mbyllë.
Sepse disa çelësa nuk janë krijuar për të hapur porta prej guri, por për të hapur mendje, ëndrra dhe të ardhme. Vepra eshte realizuar ne inox-korten nga kompania METAL ZURLO.
