Josephina, tradhtitë e gruas së Napoleonit

“Kam ecur me mendjen mbushur me mendimet për ty. E ëmbla ime, e pakrahasueshme ç ‘efekt të çuditshëm ke mbi zemrën time. Por çfarë mbetet akoma kur nga buzët e tua, zemra jote merr një dashuri që më tret si zjarri? Je e zemëruar?

Pse më dukesh e trishtuar? Je e shqetësuar? Sa dhimbje ndjej në shpirt! Ti do të largohesh në mesditë. Do të të shoh brenda tri orëve. Deri atëherë, e dashura ime e ëmbël të dërgoj njëmijë puthje, por mos më jep asnjë si shkëmbim, pasi ato ma ndezin gjakun më keq”.

Napoleon Bonaparti i shkruante kështu të shoqes Josephine (Xhozefine) duke dashur të mos mbante brenda tij, asnjë mendim dashurie. Burri i njohur për fuqinë në beteja, nuk kishte ndroje të tregohej i dobët kur vinte fjala për dashurinë. Ai sot kujtohet si burri që shkroi pafund letra dashurie, me fjalët që do tia kishin zili edhe poetët.

Por kush është Xhozefina, gruaja e bukur për të cilën u shkruan aq letra dashurie? Joséphine de Beauharnais lindi më 23 qershor 1763 dhe ishte gruaja e Napoleonit si dhe mbretëresha e parë e francezëve, e njohur si mbretëresha Josephine. Martesa e saj me Napoleonin ishte e dyta. Burri i saj i parë ishte Alexandre de Beauharnais. Dy fëmijët e saj nga martesa e parë u bënë pjesë e familjes mbretërore pas martesës me Napoleonin.

Shtëpitë e saj në Belgjikë, dhe Luksenburg vazhdojnë të jenë edhe sot si një pikë pelegrinazhi për mijëra turistë. Pas divorcit me Napoleonin, pas lidhjes së tij me Marie Louisë të Austrisë ajo nuk u martua më. Para njohjes me Bonapartin ajo kishte lidhje me figura të njohura politike të kohës si Paul Francois, Jean Nikolas Barras.

Në vitin 1795 ajo takoi Bonapartin i cili ishte gjashtë vite më i vogël se ajo, dhe menjëherë ranë në dashuri. Në një letër të shkruar në dhjetor të atij viti ai i shkruan: ”U zgjova me ty brenda meje. Imazhi yt dhe kujtimet e natës së mbrëmshme vazhdojnë të më rëndojnë trupin”.

Në janar të vitit 1796 Napoleoni i propozoi për martesë dhe u martuan në 9 mars të atij viti. Para njohjes me Bonapartin ajo njihej nga të gjithë me emrin “Trëndafili”, por Bonaparti preferoi ta thërriste Josephinë.

Martesa me të nuk u prit mirë nga familja e Bonapartit, pasi ajo vinte nga një martesë dhe kishte dy fëmijë. Nëna e tij dhe motrat asnjëherë nuk qenë dakord për këtë lidhje. Vetëm dy ditë pas martese ai udhëton drejt Italisë në beteja. Në letrat që shkruan prej Italisë nuk fsheh mallin e ndarjes prej saj. Por pavarësisht kësaj dashurie, raporti i tyre ka pasur dhe tradhti brenda.

Flirti që Josephinë pati me oficerin Hussar, do ta zemëronte Napoleonin dhe do ta çonte më lehtë drejt femrave të tjera. Në vitin 1798 ai nisi një marrëdhënie me Pauline Foures, gruan e një oficeri të ri, e njohur si Kleopatra e Napoleonit. Pas kësaj lidhje, raporti mes Josephinës dhe Napoleonit nuk do të ishte më i njëjtë dhe kjo ndjehet dhe tek letrat. Në dhjetor të 1800 Josephinë gati sa nuk u vra në një atentat ndaj Napoleonit.

Më 24 dhjetor ajo u nis bashkë me të për të parë opera. Familja ishte duke udhëtuar me dy karroca. Josephina ishte në të dytën bashkë me vajzën Ortencia. Josephinë do të vonohej për të shkuar në opera, pasi kishte harruar shallin e mëndafshit, duke i shpëtuar kështu shpërthimit. Por pavarësisht zhgënjimeve, tradhtive që shoqëruan raportin mes tyre, dashuria e Napoleonit për të, ka mbetur sot si një pamflet për dashurinë në mijëra letra që vijojnë të botohen në çdo gjuhë të botës, çdo vit./shqip/