Romani i shkrimtares Irma Kurti, një nga ‘200 librat më të bukura në Itali’

Romani i shkrimtares shqiptare Irma Kurti “In assenza di parole” (Në mungesë të fjalëve) i botuar nga shtëpia botuese Kimerik është shpallur si “një nga 200  librat më të bukura në Itali” në seksionin e prozës së gjatë. Këtë klasifikim bën juria e kualifikuar e Konkursit Letrar Kombëtar të titulluar “Tre ngjyrat” në Lenola, në provincën Latina, në qendër të Italisë. Vepra është botuar për lexuesin shqiptar me titullin “Njeriu që  fliste me pemët”, nën logon e shtëpisë botuese Dudaj në vitin 2015.

Në komisionin përzgjedhës merrnin pjesë dhjetëra përfaqësues nga institucione kulturore si biblioteka, qendra kulturore dhe sisteme bibliotekare në të gjithë territorin kombëtar. Ai përbëhej gjithashtu nga anëtarët e Shoqatës Kulturore Kinemaja dhe Shoqëria Lenola, organizatore e konkursit si dhe lexuesve të shumtë apo grupeve të leximit. Brenda periudhës një – vjeçare në vazhdim librat e përzgjedhur do të prezantohen dhe do të promovohen përpara lexuesit italian nëpër biblioteka apo mjedise të tjera kulturore.

Në vitin 2018 shkrimtarja e ka prezantuar romanin “In assenza di parole” gjatë udhëtimit letrar për në Barcelonë “Një anije me libra” me rastin e Ditës Botërore të librit; në 2019 ai u vlerësua si një nga 12 veprat finaliste në  Konkursin e madh Letrar të shpallur nga Shtëpia e Shkrimtarëve në Sanremo dhe Shtëpia Botuese Booksprint Edizioni.

“Kënaqësia  më e madhe është fakti që ky libër është bazuar mbi ditarin e babait tim”- thotë Irma Kurti. “Ai tregon jetën e një familjeje shqiptare në një vend të huaj, vështirësitë dhe sfidat që duhet të përballojë, pjesë e pandashme e një realiteti migrues. Por me këtë roman më lidh më tepër dashuria dhe kujtimi i babait, Hasan Kurti, fëmijës jetim që iu desh të jetonte plot sakrifica dhe privime dhe që, në saj të këmbënguljes, u bë mjek i njohur dhe i dedikuar në shërbim të pacientëve”.

Irma Kurti jeton në Bergamo të Italisë. Ajo ka botuar nëntëmbëdhjetë libra në gjuhën shqipe dhe dymbëdhjetë në italisht. Veprat e saj janë përkthyer gjithashtu në gjuhën angleze dhe rumune.