Vdes autori i 48 romaneve me më shumë se 140 milionë kopje të shitura

Romanticieri i njohur, Wilbur Smith ka ndërruar jetë në moshën 88-vjeçare në shtëpinë e tij.  Smith botoi 49 romane gjatë gjithë karrierës së tij, duke shitur më shumë se 140 milionë kopje në mbarë botën. Ky lajm i trishtë u bë i ditur përmes një deklarate ku flitet gjithashtu edhe për sukseset e autorit, të cilat janë të shumta. Romani i parë i Wilbur Smith, “Kur luani ushqehet”, botuar në vitin 1964, ishte një bestseller i menjëhershëm dhe secili prej romaneve të tij të mëvonshëm është paraqitur në top listat e bestsellerëve, shpesh në vendin e parë, duke i dhënë autorit mundësinë për të udhëtuar larg në kërkim të frymëzimit dhe aventurës. Në deklaratë thuhet se Smith ishte një “avokat i pasionuar i trillimeve aventureske”. “Ai i ka transportuar lexuesit e tij në minierat e arit në Afrikën e Jugut, piraterinë në Oqeanin Indian, thesarin e varrosur në ishujt tropikal, konfliktin në Arabi, Egjiptin e lashtë, Gjermaninë, Parisin, Indinë, Amerikën dhe Antarktikun, duke ndeshur me tregtarë të pamëshirshëm diamanti dhe skllevërish si dhe gjuetarë të gjahut në xhunglat dhe shkurret e shkretëtirës afrikane”. Për humbjen e këtij personazhi të njohur që ka dhënë një kontribut të madh në fushën e artit dhe letërsisë, ka folur dhe agjenti letrar i Smith-it, Kevin Conroy Scott, i cili tha: “Wilbur Smith ishte një ikonë, shumë i dashur nga fansat e tij, të cilët librat e tij ia kaluan brezave, baballarët te djemtë dhe nënat vajzave”.