Vuçic del kundër BE-së, nuk pranon të dënojë sulmin rus mbi Ukrainën

Anëtarët e Qeverisë së Serbisë, në mbledhjen e djeshme ku mori pjesë edhe presidenti serb, Aleksandar Vuçiq, vendosën të mos pranojnë propozimin e Bashkimit Evropian që Serbia të dënojë kërcënimin ndaj integritetit territorial të Ukrainës, dhe të apelojë për respektimin e së drejtës ndërkombëtare. Sipas medias nova.rs, Serbia nuk e pranoi propozimin e BE-së për të dënuar të gjithë ata që rrezikojnë integritetin territorial të Ukrainës dhe nuk do të dënojë pushtimin e Rusisë në atë vend. Siç mësohet, në takimin në Nemanjina nuk është folur për sanksione ndaj Rusisë. Ministrat e SPS-së Branko Ruziç dhe Novica Tonçev, të cilët abstenuan gjatë votimit, nuk mbështetën vendimin e shumicës për të hedhur poshtë propozimin e BE-së që Serbia të apelojë për të respektuar integritetin territorial të Ukrainës. Presidenti i Serbisë, Aleksandar Vuçiq, sot duhet ta bëjë publike këtë qëndrim, pas një seance tjetër të Këshillit të Sigurisë Kombëtare dhe takimit me Patriarkun Porfirio, me të cilin do të diskutojë edhe për situatën në Ukrainë.