Shkarkimi i Gledis Nanos, ambasada amerikane: Ishte partner i fortë!
Gledis Nano nuk do të jetë më Drejtor i Përgjithshëm i Policisë së Shtetit që nga kjo e mërkurë, kur me vendim të qeverisë u vendos që ai të lirohej nga detyra vetëm pak muaj pasi e mori postin, me argumentin se nuk i ka realizuar objektivat.
Pas vendimit për shkarkimin e Gledis Nanos ka reaguar edhe Ambasada e SHBA-ve në Tiranë. Institucioni përfaqësues i Shteteve të Bashkuara në vendin tonë nënvizon se Nano ishte një partner i fortë i si drejtor i Policisë së Shtetit shqiptar dhe më parë, si drejtor i Zyrës kundër Terrorizmit.
“I shprehim vlerësimin tonë Gledis Nanos, i cili ishte një partner i fortë i si drejtor i Policisë së Shtetit shqiptar dhe më parë, si drejtor i Zyrës kundër Terrorizmit”, thuhet në postimin e ambasadës amerikane.
Gledis Nano u shkarkua nga detyra e tij si Drejtori i Përgjithshëm i Policisë së Shtetit. Vendimi u mor pas mbledhjes së ministrave, ndërsa u bë publike nga vetë ministri i Brendshëm Bledi Çuçi i cili shkarkimin e Gledis Nanos e ka lidhur me mos përmbushjen e objektivave të vendosura.
Teksa tha se Nano nuk i ka realizuar detyrat, Çuçi ka shtuar se deri në një vendim të dytë Drejtor i Policisë do të jetë Tonin Vocaj i cili aktualisht mban postin e nëndrejtorit.
Ngjarjet kriminale të ndodhur së fundi, Çuçi bën përgjegjës vetëm drejtorin e Përgjithshëm të Policisë së Shtetit duke përjashtuar çdo mundësi për një largim mundshëm të tij. Për Çuçin, shkarkimi i Nanos është i mjaftueshëm që Policia e Shtetit të ketë një reagim më të fortë në luftën kundër krimit.
“Ka shkallë përgjegjësie deri tani, qeveria ka menduar që ndryshimi i menaxhimit nëpërmjet shkarkimit të Nanos është një masë efikase për të pasur një reagim më të fortë në luftën kundër krimit”, tha Çuçi në përfundim të mbledhjes së Këshillit të Ministrave.
Gledis Nano u emërua Drejtor i Përgjithshëm i Policisë së Shtetit më Tetor 2021 duke pasuar Ardi Veliun në këtë detyrë.