Vita Blloshmi-Kozeli: NË VËSHTRIMIN E NJË GRUAJE

Në vështrimin e një gruaje janë dielli e hëna,

janë yjet që hijeshojnë qiellin, gjithësinë,

tek ai vështrim ka vënë zemrën nëna,

që e lind dhe e bën njeri – njerinë…

Në vështrimin e një gruaje është dashuria,

që ka forcë t’ia lëvizë tokës meridianet,

në gjirin e saj merr jetë e rritet fëmija,

që me emrin e nënës çan detet e oqeanet.

Në vështrimin e një gruaje çel sythe vetë jeta,

e kopshte trëndafilash harlisen në atë vështrim,

nën qerpikët e harkuar ka strehën e vërteta,

që buzët hezitojnë ta thonë me nxitim…