Lulzim Tafa: POEZIA MBI UJË
Lulzim Tafa u lind më 2 Shkurt 1970 në Lipjan afër Prishtinës, Kryeqytetit të Republikes së Kosovës. Shkollimin fillor dhe atë të mesëm e ka përfunduar në vendlindje, kurse studimet themelore dhe pasuniversitare i ka përfunduar në Fakultetin Juridik të Universitetit të Prishtinës. Studimet e doktoratës në fushën Juridike i ka përfunduar në Fakultetin Juridik të Universitetit të Sarajevës duke fituar titullin Doktor i Shkencave Juridike.
Lulzim Tafa ka një përvojë të konsiderueshme si profesor i rregullt dhe profesor vizitor i lëndëve penale në disa universitete në Kosovë, por edhe jashtë saj. Aktivisht merret me veprimtari të fushës së të drejtave të njeriut si dhe është lobues për të drejtat e kafshëve.
Ka ushtruar funksione me rëndësi në tërë hierarkinë akademike, përfshirë poste menaxhuese në qendra kërkimore, fakultete dhe në shërbime universitare. Është anëtar i redaksive të disa revistave shkencore vendore e nderkombetare dhe anëtar i këshillave udhëheqëse të disa organizatave në fushën e shkencave juridike, të drejtave të njeriut, kriminalistikës, etj.
Aktualisht është Rektor i Universitetit AAB, univesitetit më të madh jopublik ne Kosovë e në rajon ku është shquar për udhëhqje kreative duke e berë Universitetin qendren kryesore arsimore të Kulturës dhe artit në vend. Ështe themelues i Qendres për Mbrojtjen e të Drejtave të Njeriut në Universitetin AAB, i Qendrës Kulturore dhe i Teatrit Profesionist “Faruk Begolli”. Ka themeluar pesë çmime nderkombëtare në fusha të ndryshme përfshirë edhe çmimin ndërkombëtar për letërsi dhe arte “Ali Podrimja”. Po ashtu është angazhuar për krijmin e lehtësirave për student me nevoja të veçanta dhe pjestar të Komuniteteve pakicë. Nga Revista Euromenager dhe Unioni i Menagjerve të Europes është Zgjedhur menagjer i vitit në fushën e arsimit.
Si krijues Lulzim Tafa i takon plejadës së poetëve të viteve të nëntëdhejtë, në kohën kur në Ballkan kishin shpërthyer luftëra të përgjakshme si rezultat i shpërbërjes së ish-Jugosllavisë. Ishte kjo kohë kur popullit të Kosovës i kanosej shfarosja etnike dhe kulturore. Poezi ka filluar të shkruaj si nxënës i shkollës fillore. Poezitë e para i ka botuar në revista të shkollës së mesme, ndërsa librin e parë me poezi e ka botuar si student.
Lufta dhe katastrofa humanitare e vitit 1999 e gjeti në Kosovë. Lufta i shkatërroi shtëpinë e tij, biblotekën, librat, fotografitë, së bashku me kujtimet dhe mbi 300 poezi në dorëshkrim. Pas luftës ai vazhdoi të merret me të drejtat dhe liritë e njeriut, duke promovuar paqe dhe liri për të gjithë. Ai është nderuar me mirënjohje dhe çmime të ndryshme vendore dhe ndërkombëtare. Në kuadër të angazhimeve intelektuale dhe profesionale ka botuar disa libra shkencorë dhe monografik në fushën e Drejtëisë . Pos kësaj është kolumnist i rregullt për disa gazeta, revista dhe portale informative dhe kulturore.
Megjithëse jurist me profesion, profesioni i tij primar dhe pasioni jetësor është letërsia. Ai është autor i shumë librave me poezi, prozë, poezi e dramatizuar, kritikë letrare e të tjera. Poezitë e tij janë të përkthyera në disa gjuhë të botës dhe të përfshira në disa antologji, është shpërblyer me shumë çmime letrare.Veprat e tij deri më tani janë përkthyer në gjuhët angleze, gjermane, italiane, serbe/kroate, boshnjake, rumune, frënge, suedeze, arabe, maqedone etj.
Shtëpi të njohura botuese nga mbarë bota kanë përkthyer dhe botuar librat e tij, kurse shkrimtarë e kritikë letrarë nga vendi dhe bota e kanë vlerësuar krijimtarinë e tij artistike. Për poezinë e Lulzim Tafës, kanë shkruar dhe i kanë botuar ato revistat më të njohura ndërkombëtare të fushës së letërsisë. Është njëri ndër poetët më të njohur dhe më të përkthyer të letërsisë shqipe në botë.
Është anëtar i rregullt i Akademisë Evropiane të Shkencave dhe Arteve.
Për kontributin e tijë në fushën e letërsisë, Presidenti i Kosovës e ka dekoruar me medajlen presidenciale të Meritave, tituli më i lartë që i dedikohet përsonaliteteve të shquara për kontribut të veçantë në fushën e letërsisë dhe artit.
Jeton në Prishtinë.