Zana Tako: Syth i paçelur…

Syth i paçelur ende brenda zemrës sime,

të ruaj nga i ftohti i acartë,

nga shiu që lag deri në palcë,

nga thatësira, nga ngrica

të ngroh me flakën e ngadaltë që nuk fiket.

 

Je brenda meje, syth i paçelur,

i brishtë si dora e fëmijës së porsalindur,

si belbëzimë e ëmbël,

si dritëz që nuk verbon,

zgjon kujtime,

që nuk të lodhin kur i kujton.

 

Të ruaj sa ditë e sa netë,

pa e flakur ndjenjën,

pa e zvenitur dëshirën.

Prani engjëjsh, filizi i qenies tënde,

syth i paçelur që pret shpërthimin.

 

Po rritesh brenda ngrohtësisë,

i sigurt se jashtë bën ftohtë,

e kur të ngrohet moti,

oh, mjalt i hojes që nuk vel,

shpërthe në mirësi,

syth që çel jo me frikë

por në dashuri…

19 nëntor 2023.