Yzedin Hima: Fjalët

fjalët e thëna ndër kohëra ende jetojnë diku

se fjala kur thuhet nuk vdes kurrë

atë çast nis të jetojë thotë Emily Dickinson

Një grua mban një varëse me smeraldë fjalësh

dikush ia gdhendi një pasdite i dehur nga bukuria

dhe gruaja ende ndihet e bukur si fjalët

një vajzë u plagos me një fjalë të vetme

si helmin në vesh ia pëshpëriti dikush

disa fjalë jetojnë në një pllakë varri buzë rrugës

me fije fjalësh endet e endet gënjeshtra

disa fjalë vallëzojnë plot ritëm në një këngë

të tjera fjalë pikojnë në formën e një loti

me fishekzjarre fjalësh dikush e bën pis ajrin

teksa hirnos fytyrat e lumtura në turmë

dikush e mban vath në vesh një fjalë të thënë

ndër libra disa fjalë kanë nisur të më ndryshken

siç ndryshket qielli në shkurt nga mungesa e diellit

fjalët e pathëna po ato vdesin brënda vetes

njeriu që kurrë nuk foli është një varrezë e trishtë

ku prehen fjalët nën qiparisat e zinj të heshtjes