Altin Sh. Kajtazi: Zanë mali

 

Ah moj zanë fort t’kam dashtë

do t’stolis si varg përmbrenda

kur do t’shoh n’gjoks t’i vë

Oj e butë e brishtë si hana.

 

Ku je nisë me aq nguti

ndalu pak n’atë breg matanë

lyeji pakëz buzët me qershi

që të dukesh si perri.

 

A s’më the detit trup po i bie

për me pa t’bukurën Shqipni

shiko dielli shumë t’paska nxi

bashkë me vetulla, flokë e sy!

 

N’hije t’malit jam t’u t’pritë

fort këtë shtat ma paske rritë

gjoks e shpatulla si shkamb m’i ngrite

përdhe hanën ti ma zbrite.

 

Ti moj zanë plot hijeshi

veshma qat jelek t’zi

jelek t’zi bashkë me fustan

ngrehe trupin taman janë.

 

N’këtë fushë t’thirra me hijeshu

me za t’naltë me këndu

e më m’dashtë siç ke ëndërru

n’hije t’druve bashkë me bleru!