Gjermania i kërkon Rusisë të pranojë armëpushimin pa kushte

Ministrja e Jashtme gjermane, Annalena Baerbock i kërkoi sot Rusisë të pranojë armëpushimin në Ukrainë pa kushte, ndërsa zhvilloi një vizitë në Kiev.

“Ukraina ka treguar se jo vetëm që është e gatshme, por edhe se pranon një armëpushim pa kushte”, tha Baerbock në një takim me homologun e saj ukrainas, Andrii Sybiha.

Ministrja e Jashtme në largim, e cila do të humbasë pozicionin e saj pasi të përfundojnë negociatat e koalicionit gjerman, mbërriti sot në kryeqytetin ukrainas në shenjë mbështetjeje për Kievin.

Vizita nuk ishte paralajmëruar më parë për shkak të shqetësimeve të sigurisë.

Baerbock tha se strategjia e presidentit rus, Vladimir Putin nuk është paqja, por shkatërrimi i mëtejshëm, siç dëshmohet nga sulmet e vazhdueshme ndaj infrastrukturës civile dhe energjetike të Ukrainës.

“Për ne evropianët është e qartë: Nuk do të ketë heqje të sanksioneve pa paqe”, tha ajo.

Deklarata e saj vjen mes përpjekjeve të Shteteve të Bashkuara të Amerikës në javët e fundit për të ndjekur një armëpushim në konflikt, i cili filloi me pushtimin në shkallë të plotë të Ukrainës nga Rusia në shkurt 2022.

Baerbock paralajmëroi më herët SHBA-në që të mos bjerë pre e taktikave të Putinit në negociatat e armëpushimit.

“Është Putini ai që po luan me kohën, ai nuk do paqe dhe po vazhdon luftën e tij të paligjshme të agresionit”, tha ajo.

Baerbock theksoi gatishmërinë e Ukrainës për një armëpushim të menjëhershëm.

Baerbock u bëri thirrje ministrave të Jashtëm të NATO-s që pritet te takohen këtë javë, në Bruksel për të përforcuar mesazhin për SHBA-në se ajo nuk duhet të përfshihet në taktikat e ngecjes së negociatave nga Putini.

Baerbock njoftoi gjithashtu se Gjermania ka ofruar 130 milionë euro shtesë (140 milionë dollarë) ndihma humanitare dhe fonde stabilizimi për Ukrainën në përgjigje të sulmeve të vazhdueshme ruse.

Kjo ishte vizita e nëntë e Baerbock në Ukrainë si ministre e Jashtme që nga fillimi i luftës.

Ka të ngjarë të jetë vizita e saj e fundit si ministre e Jashtme pasi Gjermania do të ketë një qeveri të re koalicioni pas zgjedhjeve në shkurt./atsh