Facebook tha se do të hapë tre qendra të reja në Evropë për trajnimin e njerëzve me aftësi dixhitale. Gjigandi amerikan, i cili ka hasur vështirësi në Evropë me autoritetet rregullatorë, tha se do të hapë tre qendra komunitare në Spanjë, Poloni dhe Itali si dhe të investojë 10 milione euro në Francë përmes qendrës së hulumtimit në inteligjencën artificiale, nga e cila pritet të përfitojnë rreth 1 milion njerëz.

“Njerëzit janë të shqetësuar se revolucioni dixhital po i lë pas dhe ne duam të sigurohemi se njerëzve nuk kanë për tu munguar aftësitë e duhura në ekonominë dixhitale”, tha Sheryl Sandberg.

Këto qendra komunitare do të ofrojnë trajnime dixhitale, trajnime në fushën e medias dhe sigurisë online për të rinjtë, të moshuarit dhe refugjatët. Kjo lëvizje e Facebook vjen në një kohë kur BE-ja diskuton propozime për rritjen e taksave ndaj kompanive shumëkombëshe si Amazon, Google, Apple dhe Facebook. Bashkimi Evropian beson të ketë humbur 5.4 miliardë dollarë në taksa nga Google dhe Facebook përgjatë viteve 2013-2015.