Dita e Holokaustit, në Shkodër promovohet “Jeta ime nën pushtimin nazist”

Me rastin e 27 janarit, ditës së Holokaustit, ministria për Europën dhe Punët e Jashtme organizoi në Shkodër aktivitetin për promovimin e librit “Jeta ime nën pushtimin nazist”, të Mimi Kamhi Ergas Faraxhi.

Libri me kujtime është përkthyer në tre gjuhë, shqip, maqedonisht dhe anglisht dhe flet për kujtimet e një familje hebre, e cila në kohën e luftës është ndihmuar nga një familje shkodrane.

Në muzeun “Marubi” në Shkodër u takua vajza e Mimi Kamhi Ergas Faraxhi, e pagëzuar me emrin Drita me Ahmet Shurdha, përfaqësues i familjes pritëse shkodrane. Në fjalën e saj, Drita Kamhi Ergas Faraxhi nuk i fshehu dot emocionet ndërsa pa Shkodrën, të cilën tha se “e mbante mend si nëpër ëndrra dhe ishte e lumtur që e gjeti kështu”.

Ministri Ditmir Bushati tha se nëpërmjet përkujtimit të Holokaustit, nuk tregojmë thjesht respekt për viktimat apo të mbijetuarit, por orientojmë edhe brezin e ri drejt sfidave të së ardhmes.

“Çështjet e antisemitizmit, që duket sikur po fitojnë terren nga politikat ekstremiste që kanë parti të caktuara politike sot në Europë, por po kaq të rëndësishme janë sfidat që kanë lidhje me ekstremizmin e dhunshëm, me ideologjitë totalitare dhe keqpërdorimin e besimeve fetare për të arritur objektiva të caktuara politike”, tha ministri.

Ambasadori i Izraelit në Tiranë Boaz Rodkin u shpreh se “duhet të bëjmë të gjitha përpjekjet tona për të luftuar intolerancën, kudo dhe sido që ajo shfaqet”.