Diaspora shqiptare kërkon hapjen e katedrës së gjuhës shqipe në Kroaci

Në vazhdën e takimeve me zyrtarë të lartë të shtetit në Kroaci, zv. kryeministri Dardan Gashi, njëherësh ministri i Ministrisë së Diasporës dhe Investimeve Strategjike (MDIS), ka takuar deputeten shqiptare në Parlamentin kroat, Ermina Lekaj – Perlaska.

Qendra Kulturore, mësimi plotësues në shqip dhe hapja e Katedrës së gjuhën shqipe ishin disa nga temat e diskutuara në këtë takim.

“Diaspora shqiptare në Kroaci është e inkuadruar mirë në shoqërinë kroate, duke marrë parasysh edhe kontributin e shqiptarëve në luftën shtetndërtuese. Kosova, bashkë me Shqipërinë, do t’ju mbështesim gjithashtu”, ka thënë me këtë rast Gashi.

Ndërkaq, deputetja shqiptare me origjinë nga Prizreni, në të ardhmen e afërt, pret më shumë të rinj shqiptarë të punësuar në institucionet kroate.

“Përforcimi i raporteve tona ndërshtetërore është me rëndësi. Komuniteti shqiptar në Kroaci numëron 19 mijë veta dhe është i fortë. Po synojmë punësimin e të rinjve tanë në Institucionet e vendit”, ka thënë deputetja Lekaj Perlaska.

Nga ana tjetër, përfaqësuesit e Unionit të Shqiptarëve në Kroaci ngritën disa çështje të rëndësishme, si ajo e certifikimit të mësuesve shqiptarë në kuadër të mësimit plotësues në gjuhën shqipe, për një marrëveshje ndërshtetërore për punë sezonale në Kroaci, për mungesën e informimit të studentëve në Kosovë rreth bursave që jep shteti kroat.

“Po interesohemi edhe për fatin e luftëtarëve të zhdukur shqiptarë të Vukovarit”, ka thënë kryetari i Unionit, Esad Qollaku, njëherësh veteran i Luftës në Kroaci.

Unioni i Shqiptarëve në Republikën e Kroacisë shprehën interesim edhe në fushën e investimeve strategjike duke ofruar dhe një projekt konkret./Ylliria press/