Rrëfehet gazetarja sportive Eva Murati
Gazetarja sportive Eva Murati ishte e ftuar në “Thumb”, ku foli për suksesin në karrierën e saj, jep mendimin për debatin Mustafa Nano – Ilda Bejleri. Gjithashtu ajo flet edhe për ndryshimet e reja të jetës së saj private.
E pyetur se sa të vështirë e ka patur që të merret me sportin, Eva shprehet: “Champions ishte emisioni i sate sportiv që mua më ofrohej, i kisha refuzuar më përpara, kështu që e ndërmora si një eksperiment, por që doli një eksperiment shumë i mirë dhe fatmirësisht publiku më deshi në këtë pozicion”.
A i ke ndjerë paragjykimet kur nise këtë punë? “I kam ndjerë paragjykimet sepse ekziston një steriotip disi i keq i prezantuesve sportive. Janë tipike vajza velina që duan patjetër hapësirën e tyre në ekran, duan të duken. E në fakt unë, ashtu siç ka edhe prezantuese të tjera që po përpiqen ta ndryshojnë këtë gjë. Po përpiqen të thonë se vajzat në sport nuk janë aty vetëm për bukuroshe, vetëm për të plotësuar emisionin, por janë aty për të thënë vërtetë fjalën e tyre. E sigurisht që shembuj ka plot si në Shqipëri ashtu edhe në vende të tjera”, tha Murati.
Shefi të ka thënë të nxjerrësh dekoltenë se rrisim shikueshmërinë? “Jo, s’më ka thënë. Sigurisht që ekrani ka një etikë të caktuar që duhet përmbajtur, që duhet ndjekur. Unë dal 3 herë në ekran, 2 herë për Champions dhe 1 herë Sportsweek, kështu që fustanet ato janë, modelet ato janë. Njëherë do e kesh dekoltenë më të hapur, njëherë më të mbyllur. Nuk është shumë e rëndësishme dekolteja, sesa është e rëndësishme ajo çfarë ti flet dhe mënyra sesi ti e thua ”, shton ajo.
Çfarë mendimi ke ti si një nga moderatorët më të ndjekura sportive në vend për debatin Mustafa Nano-Ilda Bejleri?
“Do marr vetëm shembullin e shtetit fqinj ku nuk është shumë e rëndësishme nëse ti e ke hapur dekoltenë apo jo, por është e rëndësishme ajo çfarë thua e çfarë transmeton. Barbara Durso është 50 vjeç dhe sërish del me dekoltenë te goja. Nuk më pëlqen fakti që debati u shndërrua disi, jo po origjina e njërit prej personazheve. Nuk më pëlqeu fare kjo pjesë. Ilda ndoshta kishte mundësi ta tregonte veten pak më mirë në këtë drejtim, por gjithsecili e zgjedh vetë atë se çfarë do të thotë”, vijon Eva.
Ti mendon që Ilda është vulgare?
“Mendoj se edhe sheqeri i tepruar, akullorja e tepruar, edhe gjërat më të ëmbla, të mira të mundshme, kur bëhen shpesh, kur bëhen gjithmonë, bëhen disi jo vetëm të mërzitshme por do thoja se bëhen edhe pjesë e personalitetit tënd. Kështu që nëse del pesë herë nga pesë herë që ti del në televizion me dekolte, atëherë dekolteja është pjesë e jotja. Nëse del njëherë po, njëherë jo, alternohesh, atëherë jo është pjesë e etikës”, shton ajo.