Rama-banorëve të ‘Astirit’: Harrojeni, nuk u paguaj për “rrumpallën” e viteve të kaluara!

Prej më shumë se dy javë, banorët e “Astirit” vijojnë me protesta duke kundërshtuar prishjen e banesave të tyre në kuadër të ndërtimit të “Unazës së madhe”. Ata kërkojnë demshpërblim të plotë për prishjen e banesave të tyre, ndërsa kjo kërkesë e tyre shkon në vesh të shurdhët.

Edhe pse prej ditësh ata “dergjen” rrugëve, kryeministri Rama nuk merr për bazë asgjë.

Ditën e Sotme, Rama u ka bërë thirrje banorëve të zonës, të lirojnë rrugën dhe të lejojnë zhvillimin e projektit urbanistik.

Ai foli për herë të parë nga kryeministria, gjatë një takimi me koordinatorët. Ai tha se nuk do të pranojë të paguajë për “rrumpallën” e viteve të kaluara duke iu referuar banorëve që nuk janë të legalizuar dhe u ka bërë thirrje të lirojnë rrugën.

Kryeministri nuk ka bërë asnjë lëshim për qindra familjet që u shemben shtëpitë dhe bizneset.

Ai i quajti “shprehja më spektakolare e një degradimi total të të menduarit shoqëror e politik të këtij vendi”.

Kryeministri Rama qëndroi i prerë me banorët që protestojnë ndërsa theksoi se atje ku janë bërë ndërtime mbi pronën e përbashkët të qytetarëve, nuk do të ketë legalizime. Mes të tjerash kreu i qeverisë sulmoi edhe opozitën, duke shtuar se asaj i ka ngelur vetëm flamuri i grisur.

“Pa asnjë gajle bllokojnë qarkullimin dhe natyrisht janë shprehja më spektakolare e një degradimi total të të menduarit shoqëror dhe politik të këtij vendi. S’po zgjatem. Por meqë folëm për legalizim, thash ta sqaroj. Por që të kesh aplikuar në legalizim, s’do të thotë se je legalizuar. Nëse shtëpia jote bie mbi shtratin e lumit, mbi tubacionet e ujësjellësit/kanalizimit dhe kështu me radhë. Janë qartësisht të përcaktuara në ligj që e bëjnë të qartë këtë gjë. Një godinë nuk mund të kthehet në pronë të ligjshme kur cënohet prona e ligjshme e përbashkët. Ka një abuzim të madh me këtë koncept. Nuk është e njëjta gjë që të kesh ndërtuar një shtëpi për të futur kokën në një territor ku s’je bërë pengesë dhe të ndërtosh kate të tëra për biznes në shtratin e rrugës dhe të pretendosh pas 15 vitesh dëmshpërblim 100%. Po për çfarë? Kundrejt të drejtës morale të atyre që jo vetëm që s’kanë zaptuar, por kanë respektuar dhe kanë paguar taksat. Duhet të marrim para nga buxheti për të dëmshpërblyer zaptuesit profesionit? Jo kjo është e papranueshme dhe nuk gëlltit në asnjë formë. Thirrja ime është që ata njerëz të largohen nga rruga për t’i hapur rrugë zhvillimit dhe mos të turpërojnë dhe të bëhen gazi i botës dhe ‘mish për tokë’ të atyre që s’u ka ngelur asgjë në shpirt dhe u ka ngelur një flamur i grisur dhe bëjnë opozitës”, pohoi ai.

“Kemi njohur një kategori deri dje të panjohur, është ajo shprehja iku ujku dhe çakalli bën kërdinë. Individë, që shfaqen kërcënues dhe të lënduar në bllokimin e paligjshëm të pandershëm të rrugës. Kërcënojnë se duan dëmshpërblim nga taksat e qytetarëve që i është marrë territori, që meritojnë unazën e re, e pa asnjë gajle bllokojnë qarkullimin e janë shprehja më spektakolare e një degradimi total të të menduarit shoqëror e politik të këtij vendi”, tha Rama.