“Ne kemi dashur të tregonim se sa krenarë ndjehemi me fitoren e skuadrës sonë ndaj Rumanisë», ka thënë Vlora Gashi. Ajo e ka postuar po ashtu këtë fotografi në facebook dhe në grupin «Du bisch en Albaner, wenn…» (Ti je shqiptar, nëse…)

Shfaqja e gëzimit dhe krenarisë të cilat Kombëtarja ua ka dhuruar të gjithë shqiptarëve por merr trajta nga më të ndryshmet jo vetëm në vendin ku është zhvilluar ndeshja. Pamje të shprehjes në mënyrë kreative të këtij gëzimi shihen ngado. Njëra që dallon nga të tjerat, që paraqet një flamur gjigant shqiptar mund të shihet në murin ballor të shtëpisë së Vlora Gashit, 22 vjeçare nga qyteti i vogël i kantonit Thurgau të Zvicrës, Kreuzlingen. «Në Kreuzlingen është vendosur flamuri sigurisht më i madh shqiptar në Zvicër» ka shkruar për 20minuten.ch reporteri lexues Bujar Emini, transmeton albinfo.ch. «Ne kemi dashur të tregonim se sa krenarë ndjehemi me fitoren e skuadrës sonë ndaj Rumanisë», ka thënë Vlora Gashi. Ajo e ka postuar po ashtu këtë fotografi në facebook dhe në grupin «Du bisch en Albaner, wenn…» (Ti je shqiptar, nëse…). Reagimet janë shumë pozitive. Flamurin nuk e ka blerë në mënyrë të veçantë për Evropianin por para sa kohësh për Shoqërinë e Vallëzimit ku vepron Vlora dhe familja e saj, përcjell albinfo.ch. Fakti se flamuri i Zvicrës duket shumë më i vogël në krahasim me atë shqiptar nuk do të thotë se zemra e saj rrah më pak për Zvicrën. «Thjesht, nuk kishim më të madh», thotë ajo duke qeshur. Ajo thotë se tashmë e ka hequr flamurin nga muri ndërsa do ta vendose sërish në rast se Kombëtarja kualifikohet për garat e mëtejme.