Tre ish-presidentët amerikanë bëhen bashkë për të ndihmuar refugjatët afganë

Ish -presidentët amerikanë, republikani George W. Bush dhe demokratët Barack Obama dhe Bill Clinton, së bashku me ish zonjat e para Laura Bush, Michelle Obama dhe Hillary Clinton, janë bërë bashkë për të ndihmuar refugjatët afganë që të rifillojnë jetën e tyre në SHBA.

Ish-presidentët dhe zonjat e tyre do të jenë presidentë nderi të grupit “Welcome US”. Grupi ka synim të angazhojë të gjithë amerikanët që të mirëpresin dhe të mbështesin çdo individ dhe familje që la Afganistanin pas tërheqjes amerikane nga vendi javët e fundit.

Grupi gjithashtu ka mbledhur një grup bipartiak guvernatorësh për të shërbyer si një pikë kontakti në çdo përpjekje publike dhe private për të ndihmuar refugjatët afganë.

Pas evakuimit më të madh ushtarak në histori, administrata e Biden ka marrë përsipër të zhvendosë më shumë se 60,000 refugjatë afganë në SHBA gjatë javëve të ardhshme.