Sadik Bejko: Në vend të një urimi për Ibrahim Vasjarin

Sot ai ka ditëlindjen.

Ai është pasardhës i një familjeje me emër. Paraardhësit e tij ishin gjeneralë në ushtrinë e Ali Tepelenës, Ago Vasjari. Veis Vasjarit i del emri në kryengritjet e Tanzimatit. “Vanë ata burrat e parë/Çelua me Veis Vasjarë”. Vasjarët e kësaj familjeje dalin në radhët e burrave të Lidhjes së Prizrenit për Tepelenën.

Babai i ibrahimit, Syrja bej Vasjari, studioi në Francë dhe u kthye prej andej me diplomën e inxhinierisë agrare. Punoi në bashkinë e Tepelenës në vitet ’30. Si patriot antifashist, ai luftoi me çetën e tij nacionaliste në krahë të partizanëve. Shtëpia e tij u dogj nga pushtuesi. Në vjeshtën e vitit 1943 ai u tërhoq nga lufta.

Më 1948 atë me akuza të montuara e pushkatuan në krahë të ish-komisarit partizan, bashkëluftëtarit të tij, Zenel Shehut. Krahë për krahë me ta u pushkatua prifti atë Gjergj Suli dhe klerikët bektashinj baba Ali Tomorri, baba Shefqet Koshtani.

Ibrahim Vasjari jetoi në Vlorë te gjyshi i tij Sefiu nga familja Dalani. Punoi si arsimtar. Më 1991 ishte ndër themeluesit e PD Vlorë.

Nga 1992-96 ka qenë deputet i Kuvendit të Shqipërisë.

Ka shkruar libra, analiza politike, ese. Veçohet për stilin e hollë e plot meditim poezia e tij. Proza e tij, romani mbi ngjarje të luftës e deti në vitet pas saj, ka shijen e një balade.

Eseistika e tij gërsheton mendimin e shtruar me humorin që rrëshqet padukshëm nën rreshta.

I uroj jetë të gjatë dhe qoftë ashtu plot shëndet dhe dashuri për jetën, për familjen, për miqtë!