DITARI SEKRET/Acarimi i Enver Hoxhës me Kadarenë për “duart e përgjakura”

Pas publikimit të ditarit sekret të Enver Hoxhës dhe shënimeve te tij për poezinë “Në mesditë Byroja Politike u mblodh”, apo siç njihet ndryshe “Pashallarët e kuq” të Kadaresë, (1975), shkrimtari i njohur ka reaguar përmes një interviste për studiuesin Dashnor Kaloçi. Kadare thotë se kishte dëgjuar se ekzistonte një ditar i tillë, por për asgjë të saktë nuk ka pasur dijeni. Shkrimtari pranon se pasi lexon gjëra të tilla për veten pas 41 vitesh, nuk mund të jesh gjakftohtë. “Zbulimi i të vërtetës për krimet e kohës, mund të bëhet vetëm me hapjen e arkivave dhe dosjeve” – shton Kadare. Shkrimtari thotë se acarimi i Enver Hoxhës, ka ardhur nga pjesa më acaruese e vjershës nga vargjet për “Duart e përgjakura”. Ky togfjalësh u mor si për duart e përgjakura të zyrtarëve të shtetit e të Partisë, thote Kadare në intervistën e tij. Kadare shprehet edhe për marrëdhëniet e tij me Dritëro Agollin.

“Lidhur me marrëdhëniet e mia me Dritëro Agollin, këtë e kam bërë të qartë gjithmonë përpara opinionit publik shqiptar dhe atij europian. Ne të dy, Dritëro Agolli dhe unë, kemi qenë për një kohë tepër të gjatë shokë të ngushtë. Të ishe shok i ngushtë me dikë në atë kohë, do të thoshte që midis jush të mos kishte sekrete politike. Ne kishim mendime pothuajse të njëjta kritike ndaj regjimit komunist, në Shqipëri dhe në botë. Në radhë të parë, kundër stalinizmit dhe gjithçkaje që lidhej me të. Kjo vazhdoi prej fundit të viteve ’50, gjatë gjithë viteve ’60 dhe deri në fillim të viteve ’70, kur Dritëro Agolli u zgjodh kryetar i Lidhjes së Shkrimtarëve. Pas kësaj ngjarjeje, bisedat tona politike vetvetiu u rralluan, por aspak në mënyrë dramatike”, ka thënë Kadare.