Binak Kelmendi: Udhëzime për të shkruar keq për Atdheun

 

Ka njëmijë arsye për të shkruar kundër Atdheut

Për të shkruar keq për Atdheun

 

Po i them disa

 

Për shembull kështu:

 

Atdheu është i keq

Se nuk ma jep kostumin e vet

Me shumë xhepa

Për t’i mbushur para

Medalje ari

Titullin hero

Dekorata trimërie

 

Pastaj pse unë nuk jam në ballë të tij

Kryetar partie

Sekretar i Përgjithshëm

Udhëheqës grupi parlamentar

Ambasador

Ministër

Kryeministër

President…

Marrës tenderësh

 

Është lehtë të shkruash kundër Atdheut

Delikt verbal ose shkrimor

Pse s’kam Pension Kombëtar

Vetëm pension moshe

Për të cilin duhen dhjetëra dëshmi

 

Pse paguaj rrymë, ujë, tatim…

 

Më së lehti është të shkruash kundër Atdheut

Kundër shtëpisë tënde

Të shash veten tënde

Të vrasësh veten tënde

Prandaj Atdheu duron

Deri në vdekjen tonë

Për Lindjen e vet.