Xhezide Selimi: MA RRËMBEN AROMËN E FRYMËMARRJES SIME

 

Drimrin në zemrën tënde do ta kthej

në pika të ngrohta uji

për brishtësinë e qenies sime.

 

Sytë e qëndisur në dy mijë ngjyra

përthyejnë dritën jeshile vezulluese

mbështjellur me membranë zane

nga fusha e bekueme.

 

Kafshët e bardha përtypin barin e

derdhur nga kurorat e maleve

uji i ambël rrjedh në drejtim të

kundërt me dashuritë fisnike.

 

Ylli i parë në kupën qiellore, ma

rrëmben aromën e frymëmarjes sime

nga shkuma e detit ngrihem

në duet me ty vallëzojmë rrathëve

t’hanës.